Дэлхийн эрүүл мэндийн байгууллага БНХАУ-д боловсруулсан, коронавирусээс сэргийлэх Синовак вакциныг яаралтай горимоор ашиглахыг зөвшөөрсөн талаар зургадугаар сарын нэгний өдөр ДЭМБ Твиттер хуудсаараа дамжуулан мэдээлжээ. 

Ингэснээр, Хятадын вакцин олон улсын аюулгүй байдлын стандарт, үр дүн, үйлдвэрлэлийн стандартуудад нийцэж байгаа гэдэгт энэ вакциныг худалдан авч байгаа улс орнууд итгэлтэй байж болох юм. Вакциныг яаралтай горимоор ашиглахыг санал жагсаалтад багтаасны дараа Хятадын вакциныг олон улсад худалдан авах, КОВАКС хөтөлбөрөөр дамжуулан нийлүүлэх боломжтой болох аж. 

"Бүхий л хүмүүст вакцин тэгш хүртээмжтэй байхын тулд дэлхий дахинд коронавирусээс сэргийлэх вакцин асар их хэмжээгээр шаардлагатай байна" хэмээн ДЭМБ-ын Ерөнхий захирлын туслах Марианжела Симао мэдэгджээ. 

Одоогийн байдлаар, ДЭМБ зөвшөөрсөн вакцинуудын жагсаалтад Хятадын Синофарм компанийн Синовак вакцинаас гадна Пфайзер/Бионтеч компанийн Comirnaty, Жонсон энд Жонсон компанийн Janssen, Модерна болон АстраЗенека гэсэн вакцинууд багтаж байгаа юм.

Г.Бямбасүрэн