Ерөнхий сайд Л.Оюун-Эрдэнэ УОК-ын Шуурхай штабт ажиллалаа. Энэ үеэр Ерөнхий сайд дархлаажуулалтын ажилд хойрго хандаж буй аймгуудад хариуцлага тооцохыг анхаарууллаа.

Тэрбээр "Өмнөговь, Дорноговь, Сүхбаатар, нийслэл Улаанбаатарт дархлаажуулалт хамгийн сайн зохион байгуулагдаж, өндөр хувьтай байна. Харин Увс, Дундговь, Өвөрхангай аймагт дархлаажуулалт доогуур үзүүлэлттэй байна. Вакцины таталт, хүйтэн хэлхээтэй холбоотойгоор алслагдсан аймгуудыг ойлгож болно. Нийслэлтэй ойр Дундговь аймаг хариуцлагагүй байна. Тиймээс ирэх жилийн улсын төсвийг хариуцлагатай уях хэрэгтэй. Адилхан боломж, ижилхэн 24 цаг байхад ялгаатай, хойрго хандаж байгаад хариуцлага тооцох шаардлагатай" гэдгийг анхааруулж, орон нутгийн вакцинжуулалтыг эрчимжүүлэх үүргийг УОК-т өглөө.