БНХАУ анхны тойрог замын станцаа байгуулж байгаа талаар бид өмнө нь мэдээлж байсан. Энэ станц руу хүрэх, анхны жолоодлогот "Шэньжоу-12" хөлгийг маргааш буюу зургадугаар сарын 17-ны өдөр хөөргөхөөр төлөвлөсөн талаар Хятадын жолоодлогот нислэгийн хөтөлбөрийн төлөөлөгч Ли Цимин мэдэгджээ. 

Түүний өгүүлснээр, зургадугаар сарын 17-ны пүрэв гарагт гурван сансрын нисэгч сансарт хөөрөх гэнэ. Хөлгийг Ганьшу муж дахь "Жюцюань" сансрын буудлаас 09.22 цагт хөөргөхөөр төлөвлөсөн байна. 

Эргэн сануулахад, Хятад улс "Тяньгун" тойрог замын станц байгуулахаар энэ станцын үндсэн модуль болох "Тяньхэ"-г дөрөвдүгээр сарын 29-ний өдөр тойрог замд амжилттай оруулсан юм. Тавдугаар сарын сүүлээр Хятадын "Тяньжоу-2" ачааны хөлөг "Тяньхэ" модультай холбогдсон. Ачааны хөлөг задгай сансарт гарахад зориулсан хоёр скафандр, түлш  зэрэг төрөл бүрийн ачааг тойрог замд хүргэсэн байна. Энэ бүхэн нь сансарт байгуулж буй станц дээр гурван сансрын нисэгч гурван сарын туршид ажиллахад шаардлагатай болох аж. Сансрын станцыг 2022 онд барьж дуусна гэж төлөвлөж байгаа бөгөөд энэ ажлыг гүйцэтгэхэд нийтдээ 12 нислэг үйлдэх аж. 

Г.Бямбасүрэн