Улсын хэмжээнд дархлаажуулалтын ажил эрчимтэй үргэлжилж байна. Нийслэлийн хэмжээнд өдөр бүр дархлаажуулалтын төлөвлөгөө гарган ажиллаж байгаа. Тэгвэл тухайн өдрийн вакцинжуулалтын төлөвлөгөө биелдэг үү. Зургадугаар сарын сүүлийн таван хоногийн тоон мэдээллийг харвал дархлаажуулалтын төлөвлөгөө зарим өдөр давуулан биелэгддэг бол, зарим өдөр төлөвлөлтөндөө хүрдэггүй аж. Өөрөөр хэлбэл, дархлаажуулалтад хамрагдах иргэдийн идэвх хангалттай бус байгааг илтгэнэ. 

Нийслэлийн хэмжээнд дархлаажуулалтын явуулын болон суурин цэгт эмч нар багаар ажиллаж буй. Өдөр бүрийн дархлаажуулалтын төлөвлөгөөгөө биелүүлэх үүрэг хүлээнэ. Эрүүл мэндийн яамнаас мэдээлж буйгаар нийгмийн харилцаанд хамгийн их оролцдог 25-29 насны иргэдийн вакцинд хамрагдах идэвх сул байгаа гэнэ. Тиймээс иргэн та өөрийнхөө болоод хайртай гэр бүлийнхээ төлөө дархлаажуулалтад идэвхтэй хамрагдах шаардлагатай байна. Дархлаажуулалтын өдрийн төлөвлөлт биелж байвал, тооцсон хугацаандаа нийслэлчүүдийгээ бүрэн вакцинжуулж дуусч, сүргийн дархлаа тогтоно. Сүргийн дархлаа тогтвол, нийгмийн харилцаа идэвхжиж, сургууль цэцэрлэг танхимаар хичээллэж, ААН-үүд үүдээ нээх боломж бүрдэнэ. Тиймээс хариуцлагатай иргэн та дархлаажуулалтандаа хамрагдаарай. 

М.Насан