Улсын онцгой комиссоос Үндэсний баяр наадмыг хойшлуулах санал гаргаж, тун удахгүй Засгийн газар энэ асуудлыг хэлэлцэн шийдвэр гаргана. УОК-ын энэ шийдвэрийг эсэргүүцсэн уяачид яг одоо төв талбайг зорьж явна. Тэд Яармагаас мориороор цуваа үүсгэн Сүхбаатарын талбайд ирж эсэргүүцлээ илэрхийлэн, шаардлагаа хүргүүлэх гэнэ. 

Уяачдын эсэргүүцэл, шаардлага цагаа олсонгүй. Цаг үеийн нөхцөл байдал, халдварын хүндрэл ямар байгааг тэд ойлгохгүй байгаа бололтой. Дээр нь вакцинд хамрагдаагүй бага насны хүүхдүүдээр морио унуулдаг. Тэд хүний үрсийн эрүүл мэнд, амь насыг юман чинээ бодсонгүй. Тиймдээ ч төр засгийн шийдвэрийг эсэргүүцэж, түгжрэл үүсгэн байж, хотын төвийг чиглэж байна. 

Өчнөөн олон хүүхэд халдвараар өвчилж, дахиад хэд өвдөхийг тааварлах боломжгүй энэ нөхцөлд хүүхдээ аюулаас аль болох хол байлгахыг хичээж байна. Гэхдээ хэдхэн төгрөгийн хөлсөөр хүний хүүхэд зарцалдаг уяачдад хүүхдийн эрүүл мэнд, амь нас чухал биш нь тодорхой боллоо. Мэдээж уяач нарын олон сарын хөдөлмөрийг үгүйсгэхгүй. Гэхдээ энэ бол тэвчиж болохгүй, бусдын эрүүл мэнд, амь настай дүйх асуудал биш. Наадам дахиад л болно, цаашид ч үргэлжилнэ. Нөхцөл байдал хяналтаас гарсан энэ хүнд үед наадахгүй өнгөрлө гээд бид хохирохгүй. Харин ч хэдэн зуун хүний эрүүл мэнд, амь насыг аварч магадгүй юм. 

 Жил бүрийн наадмын хурдан морины уралдааны үеэр хэдэн арван хүүхэд мориноос унаж, гэмтэж бэртэн, зарим нь амь насаа алддаг. Харин энэ тухай уяач нар ам нээдэггүй. Хариуцлага ч үүрдэггүй. Хүүхэд амь насаараа хохирч, гэр бүл нь шар махтайгаа хатаад үлддэг. Энэ бол уяачдын ухамсарыг харуулах наад захын асуудал.

 

Хэрэв уяачид мориноосоо илүү унаач хүүхдийг боддог ухамсартай байсан мориор төв талбайг зорихгүй байсан. Нөхцөл байдлыг үнэлсэн төр засгийн шийдвэрийг хүндэтгээд морио тавих байлаа. Гэвч тэднийг ухамсар бус морь уралдуулж зугаацах, цаашлаад нэр алдар хүртэх туйлын хүсэл нь дийлжээ. Хүүхдийн эрүүл мэнд, амь нас чухал биш үү гэж тэднээс асуугаад ч нэмэргүй бололтой.

В.Бат