Ардын хувьсгалын 100 жилийн ойд зориулсан УИХ-ын хүндэтгэлийн чуулганаа цахимаар хийлээ.. Хүндэтгэлийн чуулганд Монгол Улсын үе үеийн Ерөнхийлөгчид, гадаадын Элчин сайд нар зэрэг хүндэт зочид оролцов.

Хүндэтгэлийн чуулганыг нээж УИХ-ын дарга Г.Занданшатар: 

-Цар тахалтай холбоотойгоор энэхүү түүхэн ойг тэмдэглэх хугацааг Монгол Улсын Засгийн газрын шийдвэрээр Ардын хувьсгалын 100, 101 жилийн ойг хамтатган тэмдэглэхээр шийдвэрлэсэн. Гэвч Монгол Улсын түүхэнд мянга мянгаар тоологдох түүхэнд алтаар бичигдэн үлдсэн хуудсанд зуунаар хэмжигдэх түүхэн ойг төрийн эрх барих дээд байгууллага УИХ онцлон тэмдэглэж, ертөнц дэлхийд түгээн сонордуулах нь зүйд нийцнэ гэж үзсэний учир хүндэтгэлийн чуулганыг зарлан хуралдуулж байна.

Бид эх оронч баатарлаг дээдсийн үр сад билээ. Нүүдэлчдийн төрт ёсыг 2200 оны тэртээ төв Азийн цээжинд анх цогцлоосон хүннүчүүд бидний өвөг дээдэс. Бадрах Монголын тулгар төрийг эмхлэн байгуулж, монгол гэрийн ханын шийрийг дэлгэн, тэлсэн агуу эзэн богд мянганы суут хүн Чингис хааны дэлхийн түүхэнд үлдээсэн өвөөр бид бахархдаг. Харийн дарлалыг сөрөн тэмцэж, тусгаар тогтнол, эрх чөлөөгөө байлдан олж, дэлхий ертөнцөд сэрсэн Монголыг тунхаглан зарласан Богд хаан, жанжин Д.Сүхбаатар тэргүүтэй эх орончдын эр зориг, ухаан мохошгүй тэмцлийн үр дүнд Монгол орон сэргэн мандах шинэ замдаа орсон гэдгийг онцлов. 

Ерөнхийлөгч У.Хүрэлсүх:

-Эрхэм хүндэт ард иргэдээ элэг нэгт ахан дүүсээ та бүхэндээ тулгар төрийн 230, Их Монгол Улсын 815, үндэсний эрх чөлөө тусгаар тогтнолоо сэргээн мандуулсны 110, Ардын хувьсгалын 100 жилийн ойн мэндийг дэвшүүлье. Төв Азийн цээжинд байгуулагдсан Монгол хэмээх улсыг ертөнцийн чихнээ дуурсгаж тэмцэл, ялалтын гайхамшигт түүхийг бүтээж, улс орныхоо тусгаар тогтнол аюулгүй байдлын төлөө алтан амиа өргөн тэмцсэн эх орончид өвөг дээдэс, улс орныхоо бүтээн байгуулалтын төлөө хөдөлмөрлөсөн ахмад үеийнхээ алдар гавьяаг дурсъя. Монголчууд бид өнгөрснөө дүгнэж, ирээдүйн зорилтоо зөв тодорхойлж гурван цагийн алтан хэлхээний учир холбогдлыг хойч үедээ сануулан таниулах учиртай.

Зуун жилийн хугацаанд Монгол Улс хэрхэн өөрчлөгдсөнийг товчхон дурдъя. 1948 оноос эхлэн улс ардын аж ахуйг таван жилийн төлөвлөгөөтэй хөгжүүлж, мал аж ахуйн орноос үйлдвэрлэл, хөдөө аж ахуйн орон болгох зорилтыг амжилттай хэрэгжүүлсэн. Аж үйлдвэр нийгэм соёлын томоохон төв болох Дархан, Эрдэнэт, Чойбалсан, Багануур, Хөтөл, Борнуур зэрэг хот суурийн газар сүндэрлэн босч хөнгөн хүнсний болон тээвэр холбоо барилга эрчим хүч, уул уурхай зэрэг олон салбар хурдацтай хөгжсөн байна. Атар газрыг эзэмшсэнээр хөдөө аж ахуй, газар тариалан бие даасан салбар болж, өнөөдөр манай улс үр тариа, гурил, төмс, хүнсний ногоо, малын тэжээлээр дотоодын хэрэгцээг бүрэн хангах боломж бүрдээд байна.

Улс орноо ойрын 30 жилдээ багтаан дэлхийн хөгжингүй орны түвшинд хүргэж нийгмийн хөгжил, эдийн засгийн өсөлт иргэдийн амьдралын чанараар Ази тивдээ тэргүүлэгч орнуудын нэг болгох томоохон зорилгыг хэрэгжүүлэх шаардлагатай болж байна.

Ард түмний эв нэгдэл улс орны оршин тогтнох үндэс юм. Олон түмэн минь эрүүл байж, олон олон улсын наадам үзэх болтугай. Монгол хүний хийморь галын дөл шигээ өөдөө байг хэмээв.

Н.Нягт