Коронавирусийн хор уршгаар наадмаа хойшлуулсан ч агаар салхинд гарах, аялж зугаалах боломжтойгоо үлдсэн. Гэр бүл, найз нөхдөөрөө хөдөөг зорьж, хаваржин, өвөлжин хоригдсон бие, сэтгэлийнхээ чилээг гаргаж явна, хотынхон. Гэхдээ бөөгнөрөлөөс зугтаарай гэж дахин хэлье. Олуулаа нэг дор цуглахгүй байх, гэр бүлээ, найз нөхдөө олны холоос аль болох зайтай байлгах нь зөвхөн өөрийн бус өрөөлийн эрүүл мэнд, амь насанд ч тустай юм шүү. Ковид-19-ийн халдвар аль хэдийнэ бүх нутгаар тархсан. Та биш гэхэд таны ойролцоо яваа хүн халдвар тээж яваа байж ч магад. Учир нь халдварын нууц хугацаа урт, халдвар авсан байлаа гэхэд шууд өвддөггүй том эрсдэлтэй. 

Монгол Улс юун төлөө өргөн уудам газар нутагтай билээ. Ийм л цагт бүгдээрээ уул уулын аманд тархаж, ус голын эргээр зай барих бүрэн боломжтой шүү. 

Аялж зугаалуж, амарч явахдаа үүсгэсэн энэ бөөгнөрөл бидэнд бөөн асуудал дагуулах болно. Зуны сар зургаа биш гурав, амралтын өдрүүд ч хязгаартай. Ард нь амьдрал үргэлжилнэ. Тэр амьдралыг хөл хорионд, зовлон түгшүүр дунд өнгөрүүлмээргүй байгаа бол аялж зугаалахдаа зайгаа барина уу. 

Мөдхөн намар болно, үр хүүхдүүд маань хичээл сургуульдаа орох ёстой. Томчууд бидний зах замбараагүй амралт, зугаалгын горыг тэд маань амсах ёсгүй. Танхимын хичээл дахин тасарч, мянга мянган хүүхэд хохирохгүй байхад та бдний энэ удаагийн амралтын их чухал үүрэгтэй юм шүү.

Наадмын амралтынхаа горыг найм, есдүгээр сард амсмааргүй байна, хүмүүсээ. Бөөгнөрч бөөн асуудал бүү үүсгээрэй.

В.Бат