Долдугаар сарын сүүлээр Турк улсад дэгдсэн ойн түймэрт 78 суурин газар өртсөн талаар тус улсын Хөдөө аж ахуй, ойн аж ахуйн тэргүүн Бекир Пакдемирли мэдэгдсэнийг Известия дамжуулжээ. 

"Манай мужид 78 суурин газар гал түймэрт өртөж, 2219 фермерт хохирол учирсан. Бид галын улмаас учирсан хохирлын үнэлгээг хийж дуусмагц хохирлыг нөхөн төлнө" хэмээн тэрбээр мэдэгджээ.

Туркийн нутаг дэвсгэрийн ихээхэн хэсгийг хамарсан гал түймрийг унтраахаар 16 онгоц, есөн дрон, 51 нисдэг тэрэг, 960 гал унтраах машин, 5000 гаруй хүн дайчлагдан ажиллаж байгаа юм байна. Галыг унтраах ажилд Орос болон Украины онгоцууд оролцож байгаа гэж Туркийн Ерөнхийлөгч Режеп Тайип Эрдоган долдугаар сарын 30-ны өдөр мэдэгдэж байв. 

Турк улсад гарсан гал түймрийг унтраахад туслах үүднээс Оросоос гурван Бе-200 онгоц, Украинаас гал унтраах хоёр Ан-32 онгоц илгээжээ. 

Гал унтраах, аврах ажиллагаа гүйцэтгэх Оросын Бе-200 онгоцтой эн зэрэгцэх онгоц дэлхийд байхгүй гэж үздэг. Энэ онгоцыг гал түймэр унтраах, эрэн хайх аврах ажиллагаа гүйцэтгэх, усны гадаргууг хамгаалах, байгаль орчны даалгавар гүйцэтгэх, зорчигч болон ачаа тээвэрлэх зорилгоор голчлон ашигладаг юм. 

Бе-200 онгоц нь газар болон усны гадаргуу дээрээс хөөрөх чадвартай. Нисэж яваад доошлон, усны гадаргуу дээр газардаж, ердөө 15 секундын дотор 12 тонн ус нөөцлүүртээ хийн, эргээд хөөрдөг аж.

Өнгөрсөн сарын сүүлээр гарсан гал түймэр Туркийн алдартай амралт, аялал жуулчлалын бүс болох Бодрум, Мармарист ч хүрч, тэндээс хэд хэдэн зочид буудлаас хүмүүсийг нүүлгэн шилжүүлсэн юм. Өнөөдрийн байдлаар Антальяд амарч буй жуулчдад учрах аюулгүй, жуулчид зочид буудалдаа эргэн очсон, гэмтэж, бэртсэн хүн байхгүй гэж Туркийн Гадаад хэргийн яам мэдээлжээ. 

Г.Бямбасүрэн