Оросын "Ногоонтнууд" нам Байгал нуурыг хамгаалах арга хэмжээг чангатгахыг уриалсан талаар Регнум агентлаг мэдээлжээ. 

"Бидэнд хоёр дахь Байгал гэж үгүй. Түүнийг хамгаалах нь бидний, нийгмийн, төрийн нийтлэг хариуцлага юм" хэмээн Байгал нуурыг хамгаалагч Сергей Зверев мэдэгдсэн байна. 

Нэн даруй авч хэрэгжүүлэх шаардлагатай арга хэмжээнүүдийн дунд цэвэрлэх байгууламжийг шинэчлэх, Сэлэнгийн целлюлоз-картоны үйлдвэрийн хаягдал хуримтлагдаж байгаад хяналт тавих, Сэлэнгэ гол болон түүний цутгалан дээр усан цахилгаан станц байгуулахаас татгалзах талаар Монголтой хэлэлцээ хийх зэрэг асуудлуудыг экологичид багтаажээ. 

"Байгал нуур дээр мянга гаруй жуулчны бааз, зочид буудал байгаагаас ихэнх нь зөрчилтэй ажилладаг. Листвянкад гэхэд нийт объектуудын ердөө 20 хувь нь л цэвэрлэх байгууламжид холбогдсон. Бохир усыг Байгал нуурын цутгалан руу эсвэл шууд нуур руу асгах нь ч бий. Тиймээс аялал жуулчлалын дэд бүтцийн объектуудыг шалгаж, ийм объектуудыг урсгал ус цэвэрлэх хатуу шаардлага тавин, ашиглалтын дүрэм гаргах ёстой" хэмээн Сергей Зверев өгүүлжээ.

Түүнчлэн ногоонтнуудын нам Сэлэнгэ голын ай савыг хамгаалах тал дээр Монгол Улстай хамтран ажиллах тухай засгийн газар хоорондын хэлэлцээ байгуулахыг санал болгосон байна. Сэлэнгэ нь Байгалд цутгадаг томоохон гол юм. Эрдэмтдийн тооцоолсноор, голын жилийн урсацын 46 хувь нь Монголын нутаг дэвсгэр дээр бүрэлддэг байна. Монгол Улсад Сэлэнгэ гол болон түүний цутгалангууд дээр усан цахилгаан станц байгуулах төсөл боловсруулж байгаагийн дээр Орхон гол дээр уул уурхайн компаниуд ажиллаж буй говь руу ус татах зорилгоор усан сан байгуулахаар төлөвлөж байгаа гэж экологчид онцолсон байна. 

"Эдгээр төлөвлөгөөг хэрэгжүүлвэл Сэлэнгэ голын унаган төрхийг устгаж, нуурын усны гроимыг өөрчилнө. Монголтой хэлэлцээ хийж, Монголын хот, сууриунгуудын урсгал усыг цэвэрлэх чанарын асуудлыг зохицуулан, Сэлэнгэ болон түүний урсацууд дээр усан цахилгаан станц барихаас урьдчилан сэргийлэх ёстой" хэмээн Андрей Нагибин анхааруулжээ.

Регнум агентлагийн мэдээлснээр, наймдугаар сарын хоёрны өдөр ЮНЕСКо Орос улсад хандан ОБайгал нуурыг хамгаалах ажил нь суларч байгааг зогсоохыг уриалсан юм. Түүнчлэн Байгал нуурын орчим байрлах үйлдвэрүүдийн хүрээлэн буй орчинд нөлөөлөх үнэлгээг дахин харахыг шаардсаны дээр ЮНЕСКО-ийн зөвлөмжийг биелүүлээгүй тохиолдолд Байгал нуурыг "аюулд учирсан" дэлхимйн өвийн жагсаалтад оруулна гэж анхааруулжээ.

Оросын экологичдын бусад саад 

Эгийн голын усан цахилгаан станцын төсөл буюу Сэлэнгэ гол дээр баригдах усан байгууламжийн асуудал чухамхүү дээрх асуудлаас болж он удаан жил гацсан юм. Монголын талын хэрэгжүүлэхээр зэхэж буй энэ төслийг урагшлуулахаар яригдах болгонд Оросын талаас энэ УЦС нь Байгал нуурт аюултай гэх зэргээр хаалт тавьсаар ирсэн. Улмаар ОХУ-ын зүгээс эрс эсэргүүцсэн байр суурьтай байгаагийн улмаас БНХАУ Монголын УЦС-ын төслийг санхүүжүүлэхээр амалсан хөрөнгөө одоогоос олон жилийн өмнө царцааж байлаа. 

Он удаан жил төсөлд садаа болж урагшлуулахгүй болгосны дараа Оросын экологичид тэр дундаа "Хил хязгааргүй гол мөрөн" экологийн эвсэл Улз гол дээр баригдах далангийн төслийг эсэргүүцэх болсон. Улмаар ЮНЕСКО-д хандсанаар, ЮНЕСКО-ийн Дэлхийн өвийн хорооны 44 дүгээр өргөтгөсөн чуулган дээр Улз гол дээр далан барихаа зогсоохыг Монголоос шаардсан талаар бид өмнө нь мэдээлж байлаа.

ЮНЕСКО Улз гол дээр далан барихаа зогсоохыг Монголоос шаарджээ

Оросын экологичид Монголын нутаг дэвсгэр дээр баригдаж буй усны далан ЮНЕСКО -ийн Дэлхийн байгалийн өвд бүртгэгдсэн "Дагуурын ландшафт"-д аюул заналхийлж байна гэж үзэн гомдол гаргаж байв.Тэд энэ даланг байгуулах жинхэнэ зорилго нь шинээр усан зангилаа үүсгэж, Монголын уул уурхайн компаниудыг усаар хангах явдал хэмээн мэдэгдэж байлаа. Тиймээс "Байгалийн өвийн хосгүй объект ашигт малтмалын олборлолт, боловсруулалтыг нэмэгдүүлэх гэсэн зорилгоос болж усгүй болох нь" хэмээн "Хил хязгааргүй гол мөрөн" Оросын эвслийн зохицуулагч Александр Колотов өгүүлж байв. 

Г.Бямбасүрэн