Энэ жилийн элсэлтийн ерөнхий шалгалт наймдугаар сарын 19-22-ны өдрүүдэд зохион байгуулагдаж дууслаа. Шалгуулагчдын хэмжээст оноо гарсан бөгөөд их дээд сургуулийн элсэлт цахимаар зохион байгуулагдаж байна. Цахим элсэлтийн талаар Элсэлтийн комиссын гишүүн н.Батдорж мэдээлэл өглөө. 

Элсэлтийн комиссын гишүүн н.Батдорж "Энэ хичээлийн жилд 50 орчим сургууль элсэлтээ цахимаар зохион байгуулна. Өнөөдөр буюу наймдугаар сарын 23-нд их, дээд сургуулийн элсэлтийн бүртгэл хаагдана. 

Наймдугаар сарын 24-ний өглөө тухайн мэргэжилд хэддүгээрт эрэмбэлэгдсэн гэдгийг гаргана.  Сургуулийн хяналтын тоонд багтсан мэргэжлээ баталгаажуулна. Элсэлтийн баталгаажуулалт наймдугаар сарын 25-ныг дуустал үргэлжилнэ.

Харин 26-ны өглөө  дахин элсэлт зохион байгуулна. Өөрөөр хэлбэл  дундаж оноотой шалгуулагчдад боломж олгохоор элсэлтийг дахин зохион байгуулна. Ингэхдээ элсэлтийн системийг дахин нээж, мэргэжил сонгох эрхийг нээнэ. Орон нутагт байгаа  шалгуулагчдадаа дахин элсэх эрхийг гурван өдрийн турш нээж өгнө.  Ингээд наймдугаар сарын 29-нд шалгуулагчид сонголтоо баталгаажуулна. Ингээд есдүгээр сарын эхээр элсэлтийн эрхийн бичиг олгогдоно. Тухайн эрхийн бичгийн дагуу тухайн сургуультайгаа холбогдож, цахим хичээлийнхээ асуудлыг  ярина. Өөрөөр хэлбэл, гэрээгээ байгуулж, элсэлтээ баталгаажуулна" гэв. 

М.Насан