Баасан гарагийн мэнд. Хичээл сургуулийн үйл ажиллагаа жигдэрч эхэллээ. Цар тахлын улмаас хоёр жилийн хугацаанд цахимаар хичээллэсэн. Харин энэ хичээлийн жилд танхим болон танхимын бус хослуулсан хэлбэрээр хичээллүүлэхээр Засгийн газрын ээлжит хуралдаанаар шийдвэрлэсэн. Ингэхдээ салбар яам нь зохион байгуулалтыг хариуцна. Тодруулбал, Ерөнхий боловсролын сургуулиуд 5/9 зарчмаар хичээллэх юм.

Манай улсад коронавирус халдварын анхны зөөвөрлөгдсөн тохиолдол 2020 оны гуравдугаар сард бүртгэгдсэн. Харин дотоодын халдвар 2020 оны арваннэгдүгээр сард батлагдсан.

Харин мутацилагдсан вирус буюу “Дельта” хувилбар өнгөрсөн зургадугаар сард бүртгэгдэж эхэлсэн. Коронавирус халдварын эхний давлагаа зургадугаар сард болсон бол хоёр дахь давлагаа энэ сард болно гэж ЭМЯ-наас мэдээлсэн. Тодруулбал, есдүгээр сарын 15-нд хоёр дахь давлагааны оргил үе болно гэж УОК-ын эрдэмтдийн зөвлөлөөс тооцоолсон. Тиймээс хичээл сургуулийн үйл ажиллагаа эхэлсэн энэ үед халдвар хамгааллын дэглэмээ сулруулж болохгүй гэсэн үг.  

Сүүлийн өдрүүдэд халдварын тохиолдол эрс нэмэгдэж эхэллээ. Тухайлбал, өчигдөр шинээр 3805 тохиолдол бүртгэгджээ. Шинээр батлагдсан тохиолдлын 912 нь Улаанбаатар хотод, 2893 нь орон нутагт, байна. Мөн хугацаанд халдварын улмаас дөрвөн хүн нас баржээ. Түүнчлэн сүүлийн 24 цагийн хугацаанд 2570 хүн эдгэрлээ.

Вакцинжуулалт эхэлснээс хойш нийслэлийн нийт хүн амын I тунгийн хамралт 74.2 хувь, II тунгийн хамралт 69.6 хувь байна. Зорилтот бүлгийн буюу 2721 (22.9 хувь) жирэмсэн эх, 12-15 насны 60.807 (68.4 хувь), 16-17 насны 24.517 (72.3 хувь) хүүхэд тус тус дархлаажуулалтын бүрэн тунд хамрагдсан байна. 

Олон нийтийн цахим сүлжээнд халдварын тохиолдол нэмэгдэх болсон нь сургууль, цэцэрлэгийн үйл ажиллагаа эхэлсэнтэй холбон тайлбарлаж буй хэсэг бүлэг хүмүүс бий. Гэхдээ халдварын тохиолдол нэмэгдэх болсон шалтгааныг хичээл сургуулийн үйл ажиллагаа танхимаар хичээллэж эхэлсэнтэй шууд холбон тайлбарлаж болохгүй юм. Учир нь сүүлийн өдрүүдэд иргэд  найр наадам  олноор зохион байгуулж байна. Ялангуяа орон нутагт бэсрэг наадам, намрын найр хурмын үйл ажиллагаа болж байгаа. Ингэхдээ найранд хол ойрын олон зочин урих аж. Энэ нь халдвар  голомтлон гарах, зөөвөрлөгдөх, олон хүн халдварт өртөх суурь  шалтгаан болж байна.

Монголчууд бид коронавирус халдвартай дасан зохицож амьдарч эхэлсэн. Гэхдээ дасан зохицож амьдрах гэдэг  халдвар хамгааллын дэглэмийг сахихгүй байна гэсэн үг биш юм. Тиймээс үргэлж халдвар хамгааллын дэглэмийг сайтар сахих нь чухал. Халдварын хоёр дахь давлагаанаас олон хүнийг хамгаалахын тулд сахилга баттай байж, бусдадаа шаардлага тавих хэрэгтэй байна. 

М.Насан