БНХАУ-ын эрх баригчид боловсролын салбарын өөрчлөлтөд ихээхэн анхаарч, хүүхдүүдийн ачааллыг бууруулах, гэрийн даалгаврыг цуцлах, хүүхдүүдийг компьютер тоглохыг хязгаарлах зэрэг арга хэмжээг авч байлаа. Харин энэ удаад телевизээр гарах нэвтрүүлэгт цензур тавьж эхэлсэн байна.

Тодруулбал, БНХАУ-ын эрх баригчид эмэгтэйлэг төрхтэй эрчүүдийг телевизээр гаргахыг хориглосон байна. Энэ талаарх  мэдэгдлийг Хятадын Үндэсний радио, телевизийн удирдах газрын цахим хуудсан дээр пүрэв гарагт байршуулжээ.

Мэдэгдэлд "эмэгтэйлэг" төрхтэй эрчүүд болон гоо зүйн хэм хэмжээнээс хэлбийсэн бусад зүйлсийг телевизээр дамжуулахыг шийдэмгий таслан зогсоох" болон шоунд оролцох жүжигчдийн сонголт, тэдний "хувцаслалт, нүүр будалт болон үйлдэл"-ийг хатуу хянах шаардлагатай хэмээсэн байна.

Түүнчлэн, телевизээр баян чинээлэг амьдралыг харуулахгүй, хувийн амьдралыг шүүхгүй байхыг сануулсан бөгөөд энэ нь БНХАУ-ын үнэт зүйлстэй зөрчилдөнө гэж эрх баригчид үзжээ.

Г.Бямбасүрэн