Төрийн байгууллагуудын ажил уялдаа, холбоогүй явагддагийн бэлээхэн жишээ нь Модны 2-ын зам засварын ажил болов. Улсын төсвийн хөрөнгөөр тус замыг дөрвөн эгнээ болгон өргөтгөхөөр Зам тээврийн хөгжлийн яамнаас гүйцэтгэгчийг сонгон шалгаруулж, өнгөрсөн 05 дугаар сарын 29-нд гэрээ байгуулжээ. Ингээд 06 дугаар сарын дундаас замын газар шорооны ажил эхэлсэн ч өнөөдрийг хүртэл ямар ч ахиц гарсангүй. Зуны гурван сар ухсан нүх, овоолсон шороо хэвээр байсаар, намрын сартай золгов.

Тус замыг ирэх 11 дүгээр сарын 30-нд хүлээлгэн өгөх гэрээтэй. Гэвч өнөөдөр ч шийдэгдээгүй өчнөөн асуудалтай, төрийн байгууллагууд хуралдсан, ярилцсан хэвээр байна.

Газрын эзэд “луу унжжээ”

Модны 2-ын замыг дөрвөн эгнээ болгон өргөжүүлэхийн тулд газар чөлөөлөх шаардлагатай. Хэд хэдэн байршилд газар чөлөөлсөн ч одоо хоёр байгууллагын газрын асуудал шийдэгдээгүй байна. Хоёулаа хашаагаа татахаас татгалзсан. Нэг нь төрөөс олгодог газрын төлбөрийг голсон бол нөгөө нь хувийн эзэмшлээ чөлөөлөхийг хүсээгүй байна. Тиймээс төрийн байгууллагууд энэ хоёр газрыг царайлах ажлыг бүтэн зунжин хийж, одоо ч үргэлжилж буй бололтой.

Дулааны шугам “гай” болсон уу

Модны 2-оос хороолол руу өгсөх замын уулзварт дулааны шугам сүлжээ байгаа аж. Энэ шугам сүлжээг шилжүүлэхгүй бол замыг өргөтгөх боломжгүй. Тиймээс УБДС ТӨХК-д хандсан ч боломжгүй гэсэн хариуг авчээ. Бид УБДС ТӨХК-ийн Ерөнхий инженер Ш.Мөнхжаргалаас яагаад боломжгүй шалтгааныг тодрууллаа. Тэрбээр УБДС компани тавдугаар сард шугам сүлжээний засварын ажлаа хийсэн. Энэ ажлын тендер хожуу зарлагдаж, биднийг засвараа хийсний дараа эхэлсэн гэсэн хариуг өглөө. Мөн хуучин мэдээллээр хийсэн зураг нь зөрсөн учраас ирэх жил дахин хөрөнгө төсөвлөж, энэ ажлыг хийхийг тэрбээр нэмж эхэллээ. Өөрөөр хэлбэл дулааны шугам сүлжээний байгууллага дахин мөнгө хөрөнгө, хүн хүч зарлагадаж газар ухахыг хүсэхгүй байгаа гэсэн. Тэгээд ч хүйтний улирал наашилж, айл өрхүүдэд дулаан өгөх цаг болсон байхад шугам сүлжээг хөндөх боломжгүй нь тодорхой.

Тиймээс захиалагч, гүйцэтгэгч нар дулааны шугам сүлжээ хүртэл замыг өргөтгөөд орхиж, ирэх жил үргэлжлүүлэх хувилбарыг ярьж буй аж.

 

Зам хаахыг тээврийн цагдаа зөвшөөрсөнгүй

Захиалагч, гүйцэтгэгчид Модны 2-ын замыг бүхэлд нь хааж байгаад өргөтгөн шинэчлэх саналыг Тээврийн цагдаагийн байгууллагад хүргүүлсэн аж. Харин цагдаагийн байгууллага “чухал зам учраас боломжгүй” гэсэн хариуг өгчээ.

Ингээд энэ зам газар дээрээ хийгдсэн ажилгүй, Зам тээврийн хөгжлийн яам, нийслэлийн Засаг даргын Тамгын газар, холбогдох агентлаг, хэлтсийн хооронд яриа болж, хуралдсаар сэрүүний улиралтай золголоо. Өнөөдөр ч Зам тээврийн хөгжлийн яамны Төрийн нарийн бичиг, нийслэлийн удирдах албан тушаалтнууд энэ замын ажлын гацааг арилгах талаар ярилцах гэнэ лээ.

Сонгон шалгаруулалтаа эрт зарлаагүй, зургаа чанартай үнэн зөв гүйцэтгээгүй, төрийн байгууллагуудын уялдаа холбоогүй ажлаас үүдэн иргэд зунжин, намаржин ухсан нүдийг тойрч, овоолсон шороонд дарагдах нь.

В.Бат