“Тавантолгой түлш” ХХК энэ сарын 27-ноос эхлэн борлуулалтын 40 цэгээр шахмал түлш борлуулж эхэлсэн. Иймд манай сурвалжлах баг Чингэлтэй дүүргийн Гялгар захын сайжруулсан түлш борлуулах цэгийг зорилоо. Гадаа сэхүүн салхитай хүйтэн байв. Ингээд зорисон газартаа ирэхэд шахмал түлш дууссан байлаа. Иргэд борлуулалтын цэгийн үүдэнд дараагийн түлшийг хүлээж зогсоно. Зарим иргэд “Ойрхон яваад ирье. Шахмал түлш ирвэл хэлээрэй” гээд явна. Зарим нь хэзээ ирэхийг дахин дахин асууж ярилцана.

Чингэлтэй дүүргийн Гялгар захын сайжруулсан түлш борлуулах цэгийн борлуулагч Н.Отгонцэцэг “Өнөөдөр 12.00 цагт 5 тонн сайжруулсан түлш ирсэн. Ингээд 30 минутын дотор дууссан. Сайжруулсан түлш авах гэсэн хүмүүс өглөө 08.00 цагт ирж дугаарлан хүлээж байна. Дахиад нэмэлтээр 5 тонн ирнэ гэсэн мэдээлэл байна. Гэхдээ хэдэн цагт ирэх нь тодорхойгүй байна. Тиймээс хүмүүс хүлээж байгаа. Нэг өрх долоо хоногт зургаан шуудай сайжруулсан түлш картаар авах боломжтой. Мөн картгүй бол түлш авах боломжгүй. Иргэд картаа хэрэглэгчдэд үйлчлэх албанд очиж идэвхжүүлээд түлшээ авна. Түлш хүрэлцээгүй байгаад иргэд бухимдалтай байна. Засгийн газрын шийдвэрээр 50 хувийн хөнгөлөлттэй үнээр буюу 1875 төгрөгөөр худалдаалж байна” гэв.

Засгийн газрын ээлжит хуралдаанаар 2021 оны дөрөвдүгээр сарын 01-нийг хүртэлх хугацаанд шахмал түлшний үнийг 50 хувийн хөнгөлөлттэй үнээр борлуулах шийдвэр гаргасан.

 

Сайжруулсан түлш олдохгүй байна

Чингэлтэй дүүргийн 13-р хорооны иргэн Р.Оюунчимэг:

-Түлш хүрэлцэхгүй байна. Цаг агаар хүйтэрч байна. Түлш хэрэгтэй. Гэтэл түлш олдохгүй байна. Түлшний картаа идэвхжүүлчхээд түлш ирэхийг хүлээж байна.

Хэрэв картаа баталгаажуулж чадахгүй бол түлш авч чадахгүй

Чингэлтэй дүүргийн 6-р хорооны иргэн О.Соль:

-Түлш авахаар хүлээж байна. Өглөө ирсэн ч 12.00 цагт ирсэн түлшнээс авч чадаагүй. Би  Чингэлтэй дүүргийн түр оршин суугч.  Түлш авах картаа баталгаажуулахаар холбогдох дугаар луу нь залгасан ч утсаа авахгүй байна. Хэрэв картаа баталгаажуулж чадахгүй бол түлш авч чадахгүй. Түлш ховор байна. Орой ажлаа тараад ирэхээр түлш дууссан байдаг.

Нэг шуудай мод 7500 төгрөгөөр худалдаалагдаж байна

Сүхбаатар дүүргийн 18-р хорооны иргэн Э.Галбадрах:

-Картаа идэвхжүүлчихээд түлшээ авахаар ирлээ. Цаг хүйтэрч байна. Дан мод түлээд байж болохгүй юм. Нэг шуудай мод 7500 төгрөгөөр худалдаалагдаж байна. Түлшээ авчихвал нэг шуудай модоор долоо хонох боломжтой.

Картаа идэвхжүүлээгүйгээс болж асуудал гарч, хүлээлт үүсэж байна

Сүхбаатар дүүргийн 16-р хорооны иргэн Д.Бямбацэрэн:

-Хүйтний улирал есдүгээр сарын 15-наас эхэлдэг. Орон сууцнуудын халаалт, дулаан энэ цагт ирдэг. Гэтэл энэ хугацаанд сайжруулсан түлш худалдаалсангүй. Өчигдрөөс худалдаалж эхэлсэн ч иргэдийн картыг идэвхжүүлээгүйгээс болж асуудал гарч, хүлээлт үүсэж байна. Сайжруулсан түлшээ худалдаалахаасаа өмнө түлш худалдан авах эрхийн картаа баталгаажуулах хэрэгтэй. Өнгөрсөн жил ашиглаж байсан картыг “бүртгэлгүй байна” гэнэ. Түлшний картыг баталгаажуулахдаа заавал өөрийн биеэр харьяа дүүргийнхээ Хэрэглэгчдэд үйлчлэх салбарт очих шаардлагатай аж. Сайжруулсан түлш 40 цэгт худалдаалагдаж байгаа гэсэн. Өнөөдөр бараг бүх л цэгт очлоо. Гэтэл түлш алга.

Аравдугаар сарын 01-нээс  түлш борлуулах 50 цэг нэмнэ

“Тавантолгой түлш” компанийн Хэвлэл мэдээлэл, олон нийт хариуцсан мэргэжилтэн Г.Даваабаатар: 

-Энэ жил сайжруулсан түлш борлуулах 600 цэг ажиллуулах төлөвлөгөөтэй байна. Эхний ээлжид 40 цэгээр түлш худалдаалж байна. Борлуулалтын цэгүүдэд өдөрт 5 тонн нүүрс хүргэж байгаа. Засгийн газрын хуралдаанаар 2022 оны дөрөвдүгээр сарын 01 хүртэлх хугацаанд сайжруулсан түлшийг 50 хувийн хөнгөлөлттэй үнээр борлуулах шийдвэр гаргасан. Үүний дагуу  50 хувийн хөнгөлөлттэй үнээр худалдаалж байна. Түлш борлуулах Аравдугаар сарын 01-нээс  50 цэг нэмж сайжруулсан түлш худалдаална. Цаашид үе шаттайгаар нэмэгдээд явна.

Г.Мичидмаа