Өвөл болдгийг тооцож чадаагүй сайд

Хэдхэн хоногийн өмнө нийслэлчүүд шатахуунд очерлов. Улс нь импортын асуудлаа цалгардуулснаас болж иргэд нь шатахуун түгээх станц бараадан зам дээрээ хонон өнжин дугаарлав. Харин одоо нийслэлчүүд сайжруулсан шахмал түлшинд очерлож байна. Хүйтэн сэрүүний улиралд бээрч суухгүйн тулд урт дараалал үүсгэн очерлосон ч түлш авч чадахгүй буцсан нь цөөнгүй.
Харин түлшний асуудал хариуцсан Эрчим хүчний сайд Н.Тавинбэх намрын сэрүүн унадгийг, өвлийн улирал ирдгийг тооцож чадаагүй гэнэ. Тиймдээ ч нийслэлийн гэр хорооллын 200 мянган өрхийн дунд сайжруулсан шахмал түлш борлуулах 40 цэг нээж, иргэдийг очерлуулж үзжээ. Монголын бүхий л үйл ажиллагаа очертой байдаг учраас Эрчим хүчний сайд ч иргэдийг очерлуулж үзэхийг хүссэн бололтой. Тэрбээр англичууд шатахуундаа очерлож байна, та нар “сүртэй” юм гэж түлшиндээ очерлож байгаа нийслэлчүүдийг бараг загналаа. Баян англичууд хүртэл очерлож байхад ядуу монголчууд бид чив чимээгүй л дугаарлан зогсох ёстой гэнэ.
Н.Тавинбэх сайдын үгээр бол нийслэлчүүд галдаа хийх түлшиндээ очерлож, нөхөн сонгуулийн шоу хийж байгаа бололтой. Ажлаа зохион байгуулж чадаагүй алдаагаа иргэд рүү чихдэгээ хэзээ болихын, сайд нар аа!
В.Бат
СЭТГЭГДЭЛ БИЧИХ