“Цахим засаглалд шилжих, хүнд суртал, авлигагүй төрийн үйлчилгээг бүрдүүлэх” Үндэсний хорооны хуралдаан болж байна. Хуралдааны үеэр Ерөнхий сайд Л.Оюун-Эрдэнэ  “Монгол Улс авлигын индексээр 111 дүгээр байранд байгаа нь таатай үзүүлэлт огт биш. Тиймээс бид хоёр жилийн дотор буюу 2024 оноос өмнө хоёр оронтой тоо руу орох зорилтыг тавьсан байгаа. Бид авлига их байна уу, үгүй юу гэдгийг хэмжиж чадахгүй. Үүнийг олон улсын Транспэрэнси интернэшнл байгууллага л хэмжинэ.

Өнгөрсөн хугацаанд 741 эзэн холбогдогчтой 1196 хэрэг гарсан гэдэг бол харамсмаар үзүүлэлт. Төрийн албан хаагчдадаа хандаж хэлье. Авлигатай холбоотой асуудлыг Ерөнхий сайд хамгаалахгүй шүү. Төрийн сайдаас эхлээд энгийн албан хаагч хүртэл авлигатай холбогдвол хэн ч бай ялаа эдэл. Засгийн газар авлигатай холбоотой бодлогыг илүү чангалах зарчим барьж байгаа. 90 тэрбум төгрөг буцааж төлүүлсэн, энэ нь бусад жилүүдээс гурван дахин их гэдэг нь нэг талдаа сайн. Гэхдээ асар их шамшигдал байсаар байгаа нь харагдаж байна. Авлигатай хийх тэмцэл өршөөлгүйгээр үргэлжлэхээс өөр гарцгүй" хэмээн хэллээ.

Б.Хэрлэн