Засгийн газрын өргөтгөсөн хуралдаанд сайд нараас гадна аймаг, нийслэлийн удирдлагууд оролцож байна. Тэдэнд Ерөнхий сайд хатуухан сануулга өглөө. Ажлаа хийж чадахгүй, авлига, албан тушаалын хэрэгт холбогдвол хэний ч толгойг илэхгүй гэдгээ Ерөнхий сайд мэдэгдэв

Тэрбээр “2022 оны 01 сарын 01-нээс Ерөнхий сайд Засаг дарга нарт шууд хариуцлага тооцдог эрхзүйн орчин нээгдэж байгаа шүү. Би хариуцлага тооцоод явна шүү. Өгсөн үүрэг даалгавар биелүүлээгүй 32 хүн ажлаас халагдсан. ИНЕГ, ГХГЗГ, МИАТ, ЭМЯ, Эрдэнэс Монгол компанид  юу болсныг та бүхэн сонссон байх. Авлига, албан тушаалын хэрэгтэй холбоотой 87 хүний асуудал шүүхээр эцэслэн шийдэгдсэн.

Би хэлсэн үгнийхээ хойноос тууштай явна. Үг хэлээд мартахгүй гэж ойлгоорой. Өгсөн үүрэг даалгавар биелүүлэхгүй бол сайд нарыг ч өөрчилнө. Эрх барьж байгаа намын даргын хувьд УИХ дээр ч асуудал ярина.

30 жил тогтворгүй, хэлсэндээ хүрдэггүй, үүрэг даалгавар биелүүлдэггүй явж ирлээ. Одоо энэ асуудлыг таслан зогсооно. Засгийн газрын үүрэг даалгаварыг биелүүлэхгүй бол шууд ажлаа өгөх хэрэгтэй. Гэхдээ би хэнийг ч хэлмэгдүүлэхгүй, улс төрийн асуудал үүсгэхгүй. Зөвхөн ажлаа хийж чадахгүй бол албан тушаалын хэрэгтэй холбогдвол, авлига авбал хатуу арга хэмжээ авна. Ингэж байж бид Монгол Улсын хөгжлийг урагшуулна” хэмээн орон нутгийн удирдлагуудаас ажлын хариуцлага шаардахаа хэлэв.

В.Бат