Ардчилсан намын дарга М.Тулгат цаг үеийн асуудлаар мэдээлэл хийлээ. Тэрбээр,арванхоёрдугаар сарын 06-наас 10-ны хооронд “Хүний эрхийн үндэсний чуулган” нэрийн дор Ардчилсан намын анхдугаар үндэсний чуулган зохион байгуулах талаараа мэдэгдэж, сэтгүүлчдийн асуултад хариуллаа. 

Намын анхдугаар үндэсний чуулганаараа Ардчилсан нам дотоод асуудлаа шийдвэрлэх үү? 

-Чуулган бүх хүнд нээлттэй. Хэдийгээр Ардчилсан намын дотоод асуудалд ойлгомжгүй, тодорхой бус зүйл байгаа ч хүний эрх, эдийн засаг, улс төрийн шинэчлэл зэрэг маш олон үнэт зүйлс дээрээ хамтран ажиллах талбар нээлттэй байгаа. Ер нь зөвхөн Ардчилсан намын гишүүд гэлтгүй бүх хүнд чуулган нээлттэй. 

Танд АН-ын дэд даргын албан тушаалыг санал болгосон. Энэ асуудалд ямар байр суурьтай байна вэ? 

-Миний хувьд улс төрд байгаа маань ямар нэгэн албан тушаалын төлөө биш. Ардчиллыг шинэчлэхгүй бол болохгүй болсон байна. Тиймээс улс төрийн гал тогоо руу гүн орсон. Надад АН-ын дэд дарга, ямар нэгэн албан тушаал сонин биш. Хамгийн гол нь өнөөдрийн Ардчилсан намд үүссэн нөхцөл байдлыг ашиглан гүн гүнзгий шинэчлэл хийх хэрэгтэй. 

Г.Мичид