Коронавирусийн халдвар болон түүнээс үүдэлтэй нас баралтаар дэлхийд нэгдүгээрт бичигдэж буй АНУ иргэдээ вакцинд хамруулахын тулд зарим салбарт албан журмаар вакцинд хамрагдах журам нэвтрүүлээд багагүй хугацааг өнгөрөөж байна. Албан журмаар вакцинд хамрагдах салбарт эрүүл мэнд, төрийн байгууллага, батлан хамгаалахын салбар багтсан юм. 

АНУ-ын Батлан хамгаалах яам цэргийн алба хаагчдыг вакцинд зайлшгүй хамрагдахыг сануулж, татгалзсан тохиолдолд ажлаас халах хүртэл арга хэмжээ авна хэмээн анхааруулж байлаа. Улмаар АНУ-ын Агаарын цэргийн хүчний удирдлага коронавирусийн халдвараас сэргийлэх вакцин тариулахаас татгалзсан 27 нисгэгчийг ажлаас нь халжээ. Эдгээр хүмүүс вакцин тариулах журмыг зөрчсөнийхөө төлөө ажлаасаа халагдаж буй Америкийн анхны цэргийн алба хаагчид болж байгаа юм. 

Агаарын цэргийн хүчинд алба хаагчид 11 дүгээр сарын хоёрны дотор вакцинд хамрагдах эсвэл вакцинаас татгалзах хүндэтгэн үзэх шалтгааныг баталсан баримт үзүүлэх ёстой байсан аж. Politico сонины мэдээлснээр мянга гаруй цэргийн нисэгч эмнэлгийн заалтаар эсвэл шашны шалтгаанаар вакцинаас чөлөөлөгдөх хүсэлт гаргасан байна.

АНУ-ын Агаарын цэргийн хүчний төлөөлөгч Энн Стефанекийн өгүүлснээр вакцинтай холбоотой шалтгаанаар захиргааны журмаар халагдаж буй анхны нисэгчид нь дээрх хүмүүс гэнэ. Тэд бүгд доод албан тушаалын алба хаагчид байсан аж. Эдгээр хүмүүсээс нэг нь ч эмнэлгийн заалтаар эсвэл шашны шалтгаанаар вакцинд хамрагдахаас чөлөөлөх хүсэлт гаргаагүй аж.

Г.Бямбасүрэн