Амиа алдсан албан хаагчийн асуудлаар ОБЕГ-аас тайлбар хийлээ.

ОБЕГ-ын дарга, хошууч генерал Г.Ариунбуян "Онцгой байдлын байгууллага гамшгаас хамгаалах тухай хуулийн хэрэгжилтийг хангуулах, хүн ардынхаа амь нас эрүүл мэнд,  хүрээлэн буй орчны гамшгаас урьдчилан сэргийлэх, эрсдэлийг бууруулах авран хамгаалах хариуцлагатай үүргийг гүйцэтгэдэг алба. Хуулийн хүрээнд үүргээ гүйцэтгэхийн зэрэгцээ коронавирусийн халдвараас урьдчилан сэргийлэх тэмцэх чиглэлээр Засгийн газар, УОК –оос гаргасан шийдвэрийн хэрэгжилтийг зохион байгуулах, бүх шатны шуурхай штаб болон хяналтын постууд дээр үүрэг гүйцэтгэх гамшгаас хамгаалах өндөржүүлсэн бэлэн байдлын зэрэгт цаг наргүйгээр ажиллаж байгаа.

Манай албан хаагчдын ажлын онцлог бий. Өндөржүүлсэн бэлэн байдлын зэрэгт албан үүргээ гүйцэтгэхдээ шаардлагатай тохиолдолд хуулийн дагуу уртасгасан цагаар ажиллах зохицуулалттай. Нийслэлийн хэмжээнд өвлийн улирал эхэлж буйтай холбоотой галлагааны эрсдэл үүсэхээс урьдчилан сэргийлж, угаарын хийн хордлого, ахуйн гал түймрээс урьдчилан сэргийлэх чиглэлээр хоёр  үе шаттай нөлөөллийн аяныг хоёр сарын хугацаанд нутгийн захиргааны байгууллага холбогдогх байгууллагуудтай хамтарч зохион байгуулсан. Энэ аяны хүрээнд тодорхой үр дүн гарч байгаа.

Харамсалтай нь арванхоёрдугаар сарын 03-ны өдөр аяны хүрээнд суурилуулсан Улиастайн эргэдэг уулзвар дээр байрлуулах салбарын хэвлэл материалыг буулгах явцдаа Нийслэлийн Баянзүрх дүүргийн 63 дугаар ангийн Онцгой байдлын байгууллагын албан хаагч золгүйгээр амь насаа алдсан. Энэ салбар цагдаагийн байгууллагатай хамааралгүй. Сурталчилгааны зориулалттай. Юуны өмнө Онцгой байдлын байгууллагын удирдлага, бие бүрэлдэхүүнийхээ нэрийн өмнөөс гэргий болон ар гэрт нь гүн эмгэнэл илэрхийлж, уучлалт хүсэж байна.

Шадар сайдаас тодорхой үүрэг чиглэл өгсний дагуу ОБЕГ-ын дотоод хяналт шалгалт аюулгүй байдлын газраас тухайн өдөр хяналт шалгалтын ажлыг зохион байгуулсан. Мөн холбогдох зарим нэгэн албан тушаалтнуудад цагдаагийн байгууллагад хэрэг үүсгэн шалгаж байгаа. Мөрдөн байцаалтын үйл ажиллагаатай холбоотой мэдээллийг олон нийтэд өгөх боломжгүй. Гэхдээ зарим нэгэн хариуцлага алдсан албан тушаалтнуудад захиргааны шугамаар хариуцлага тооцсон. Тухайн үед үүрэг чиглэл өгсөн Баянзүрх дүүргийн Онцгой байдлын хэлтсийн дарга болон 63 дугаар ангийн захирагчийг үүрэгт ажлаас нь чөлөөлсөн. Мөн НОБГ-ын даргад сахилгын шийтгэл ногдуулсан. Самбар буулгах явцад ажиллаж байсан албан хаагчид цагдаагийн байгууллагад шалгагдаж байгаа учир эцсийн дүгнэлт гарах хүртэлх хугацаанд албанаас түр хугацаагаар  түдгэлзүүлсэн.

Талийгаачийн ар гэрийнхэнд хуулийн дагуу нэг удаагийн буцалтгүй тусламж олгохоор ажиллаж байна" гэж мэдээллээ. 

Г.Мичидмаа