Гадаадаас ирж байгаа иргэдийг 3 хоног тусгаарлах байранд тусгаарлах шийдвэрийг УОК-ын шийдвэрийн хэрэгжилт, хяналт, шалгалттай холбогдуулан ЭМЯ, УОК, Нэгдсэн шуурхай штаб, ЦЕГ, МХЕГ-аас хамтарсан мэдээлэл хийлээ.

УОК нарийн бичгийн дарга Т.Баярхүү "Өнөөдрийн  байдлаар дэлхийн 114 улсад Омикрон хувилбар батлагдлаа. Омикрон хувилбар бүртгэгдсэн улс орнуудад халдварын тохиолдол нэмэгдэж байна. Маш эрсдэлтэй нөхцөл байдал үүссэн.

Манай улсын тусгаарлалтын ажлыг УОК хариуцан зохион байгуулж байгаа. Гадаадаас ирсэн иргэдийг тусгаарлах явцад алдаа гарсан байна лээ. Иргэдэд хүндрэл учруулсан явдал гарсан. Энэ асуудалд УОК анхаарч, засаж залруулахаар арга хэмжээ авч ажиллаж байна.  Шалгалтууд хийгээд явж байгаа. 

Арваннэгдүгээр сарын 26-наас хойш Монгол Улсад нийт 300 гаруй тохиолдол зөөвөрлөгдөн ирсэн.  Эдгээр хүмүүсийн ойрын хавьтал гээд цааш хөвөрнө. Тиймээс омикрон хувилбараас сэргийлэхийн тулд тусгаарлалтын ажлыг зохион байгуулах шийдвэрийг УОК-оос  гаргасан. Зохион байгуулалтын явцад алдаа гарсан. Иргэдээсээ уучлал хүсэж байна. Өнөөдрийн байдлаар 19 зочид буудалтай хамтарч ажиллаж байна. Өнөөдрийн байдлаар 16 буудалд 730 хүнийг тусгаарлаж байгаа. Өнөөдрийн байдлаар манай улсад Омикрон хувилбар бүртгэгдээгүй" гэж мэдээллээ.

М.Насан