Хятадад коронавирусийн халдварын дэгдэлт үе үе гарсан хэвээр байна. Хамгийн сүүлд, нэгдүгээр сарын есний өдөр гэхэд Сиань хотод бүртгэгдсэн халдварын тоо 2000 болжээ. Мөн Тяньжинь хотод омикрон штамм бүртгэгдсэн тул бүх нийтийг шинжилгээнд хамруулах, зарим төрлийн хязгаарлалтын арга хэмжээг авч хэрэгжүүлсээр байгаа юм.

Халдварыг цаашид дэгдээхгүйн тулд тун удахгүй болох Хятадын "цагаан сар" буюу Шинэ оныг угтах хаврын баярын үеэр оршин суугчдыг гэртээ байхыг уриалсан байна. Тэр дундаа Бээжин, Шанхай, Тяньжинь хотууд, Хэнань, Жэжян мужууд, Гуанши"Жуаны өөртөө засах орон болон Өвөр Монголын Өөртөө засах орны оршин суугчдыг баяраар гэрээсээ гарахгүй байхыг уриалжээ.

Коронавирусийн халдварын тархалтыг хязгаарлах үүднээс орон нутгийн эрх баригчид тодорхой арга хэмжээ авч хэрэгжүүлж байгаа бөгөөд зарим хотууд дорнын хуанлиар шинэ он угтах хаврын баяраар өөр хотууд руу зочлохгүй гэртээ үлдэхээр шийдсэн оршин суугчдад 500-1000 юань олгоно хэмээн мэдэгдсэн байна. Дорнын хуанлиар шинэ он угтах буюу Хаврын баярыг хятадууд нэгдүгээр сарын 31-ний өдрөөс тэмдэглэх юм. 

Г.Бямбасүрэн