Казахстаны хууль сахиулагчид Алматы хотод хууль бус арга хэмжээнд оролцсон, дээрэм тонуул хийсэн болон бусад гэмт хэрэг үйлдсэнд сэжиглэн 2000 гаруй хүнийг баривчилжээ. Энэ талаар тус хотын комендантын газар мэдээлсэн байна.

"Хууль бус арга хэмжээнд оролцсон, дээрэм тонуул хийсэн болон бусад гэмт хэрэг үйлдсэн  2159 хүнийг баривчлан саатуулсан. Тэднээс 67 нэгж галт зэвсэг, 3112 сум хэрэгсэл хураан авсан" хэмээн мэдээлэлд өгүүлжээ. 

Нэгдүгээр сарын хоёрны өдөр Казахстаны хэд хэдэн хотод эсэргүүцлийн жагсаал болж, улмаар энэ нь хэд хоногийн дотор олныг хамарсан эмх замбараагүй байдал, үймээн болон хувирсан юм. Тэр дундаа Алматы хотод үймээн дэгдсэний улмаас олон мянган хүн гэмтэж бэртэн, олон байгууллагыг эвдэлж сүйтгэсний улмаас их хэмжээний хохирол учирсан байна.

Г.Бямбасүрэн