Өнгөрсөн ням гаригт Хойд Солонгос дахин пуужин хөөргөсөн талаарх мэдээлэл гарч, энэ талаар даваа гаригт БНАСАУ-ын ч тал баталж байлаа. Ням гаригт хөөргөсөн пуужин нь дунд тусгалын “Хвасон-12” баллистик пуужин басан аж. 

Он гарсаар Хойд Солонгосын хөөргөсөн долоо дахь пуужин 2000 км өндөрт хөөрсөн гэж Япон, Солонгос мэдээлж байв. 

Үүнийг батлах гэрэл зургуудыг БНАСАУ дэлгэжээ. Сансраас авсан зургууд дээр Солонгосын хойгийн хэсэг болон түүний орчмын нутаг харагдах аж. Нэг гэрэл зураг дээр хөөрөх мөчийг буулгасан бол дээрээс авсан өөр нэг зураг дээр нисэж буй пуужин дүрслэгджээ. 

Энэ пуужингийн хамгийн дээд тусгал нь 4000 орчим км бөгөөд энэ нь Гуам арал дээрх Тэнгисийн цэргийн флотын Номхон далайн цэргийн гол баазын нутаг дэвсгэрт хүрэх боломжтой гэсэн үг юм. 

Хойд Солонгосын зэвсэглэлд АНУ хүрэх хүчин чадалтай алсын тусгалтай пуужингууд ч байдаг юм. Тодруулбал, “Хвасон-14” пуужингийн нислэг 10400 км бол “Хвасон-15”-ынх 13000 км байдаг. 

Он гарсаар Хойд Солонгос ийнхүү долоо дахь удаагаа пуужин хөөргөсөн нь дэлхий нийтийг түгшээж, улмаар АНУ Хойд Солонгост хандан урьдчилсан болзол тавихгүйгээр хэлэлцээ хийхийг уриалсан тухай мэдээлэл гарсан. Албан ёсоор ийм уриалга гаргасан, үүнд БНАСАУ-ын эрх баригчид хариу өгсөн эсэх нь одоогоор тодорхойгүй байна. 

Г.Бямбасүрэн