Оросын уран гулгагч Камила Валиевагийн допинг сорьцод триметадизин гэх өдөөгч илэрсний улмаас түүнийг тэмцээнээс хасаж, Оросын уран гулгагчдын багаараа авсан алтан медалийг олгохгүй гэсэн мэдээлэл гарч байлаа. 

Харин нөхцөл байдал ингэж эргэхгүй, Валиева олимпод үлдэж, Орос багийн тэмцээнд авсан алтан медалиа хадгалж үлдэнэ гэж "Чемпионат" сонин мэдээлжээ. Энэ талаар тус сонинд нөхцөл байдалтай ойр хоёр эх сурвалж мэдээлсэн байна. 

Оросын уран гулгалтын шигшээ баг багийн тэмцээнд түрүүлж, алтан медалийн болзол хангасан ч медаль гардуулах ёслолын ажиллагаа болоогүй юм. Энэ ажиллагаа хойшлох болсон шалтгаан нь 15 настай Валиевагийн допинг сорьцоос хориотой бодис бага хэмжээгээр илэрсэнтэй холбоотой гэж хэвлэлүүд мэдээлж байв. "Валиевагийн допинг сорьцод маш бага хэмжээгээр хориотой бодис илэрсэн. Гэхдээ энэхүү хольц нь спортын үзүүлэлтийг сайжруулахад ямар ч нөлөө үзүүлдэггүй гэдэг нь тогтоогдсон байдаг" хэмээн "Чемпионат" сонины эх сурвалж өгүүлж байсан юм.

Г.Бямбасүрэн