АНУ-ын Ерөнхийлөгч Жо Байден Америкийн банкуудад хадгалагдаж байгаа Афганистаны Төв банкны бүх хөрөнгө болох долоон тэрбум долларыг Вашингтоны эрх мэдэлд шилжүүлэн өгөх зарлиг гаргахаар шийджээ. Энэ талаар холбогдох эх сурвалжуудаас авсан мэдээлэлтэйгээр Нью-Йорк Таймс сонин мэдээлсэн байна. 

Эх сурвалжийн мэдээлснээр, Цагаан ордон энэ хөрөнгөнөөс 3,5 тэрбумыг 2001 оны есдүгээр сарын 11-ний өдрийн халдлагын золиос болсон хүмүүсийн ар гэр, төрөл төрөгсдөд, үлдсэн хэсгийг Афганистанд хүмүүнлэгийн тусламж үзүүлэхэд зарцуулах гэнэ. 

Ийм арга хэмжээ авснаар "Афганистан дахь 20 жилийн дайн дууссантай холбоотой хуульзүй, улс төр, гадаад бодлого, хүмүүнлэгийн асуудлуудын зангилааг" шийдэхээр төлөвлөж байгаа аж.

Өмнө нь АНУ-ын Ерөнхийлөгчийн Үндэсний аюулгүй байдлын туслах Жейк Салливан мэдэгдэл хийхдээ "Талибан" бүлэглэлийг шууд санхүүжүүлэх нь Афганистаны ашиг сонирхолд нийцэхгүй хэмээн онцолж байлаа. Түүний өгүүлснээр хараат бус этгээдүүд, байгууллагуудаар дамжуулан, тэдгээр нь хүнсний бүтээгдэхүүн, эм, нэн хэрэгцээт бараа бүтээгдэхүүн худалдан авч нийлүүлэх байдлаар АНУ Афганистанд тусламж үзүүлэхээр төлөвлөж байгаа аж.

Г.Бямбасүрэн