Хоёрдугаар сарын 15-ны өдөр уран гулгалтын эмэгтэйчүүдийн ганцаарчилсан төрлийн тэмцээн эхэлсэн юм. Энэ өдрийн гол үйл явдал нь Оросын уран гулгагч Камила Валиевагийн үзүүлбэр байлаа. 

Багийн тэмцээний үеэр дэлхий дахиныг бишрүүлж, гялалзаж явсан ч допинг дуулианд нэр холбогдсоны улмаас ганцаарчилсан төрөлд оролцож чадахгүй дээрээ тулж байсан ч Спортын арбитрын шийдвэрээр Камила тэмцээнээ үргэлжлүүлэхээр болсон юм. Тиймдээ ч Камилагийн ур чадвар төдийгүй шуугианд нэр холбогдсоноос нь үүдэлтэйгээр түүнийг хэрхэн үзүүлбэрээ толилуулахыг дэлхий даяар чих тавин хүлээж байлаа. 

Ингээд богино үзүүлбэрийн төрөлд Валиева тэргүүлж эхэлсэн юм. Тэрбээр 82,16 оноо авснаар тэргүүн байранд бичигдэж байна.

Харин хоёрдугаар байранд Оросын өөр нэг уран гулгагч Анна Щербакова 80,20 оноотойгоор багтсан бол гуравдугаарт Японы уран гулгагч Каори Сакамото 79,84 оноотойгоор бичигджээ. 

Камила Валиева өөрийг нь тэмцээнээ үргэлжлүүлэх боломж олгосон Спортын арбитрын шийдвэрийн дараа Оросын телевизэд ярилцлага өгөхдөө "Маш хүнд өдрүүд байлаа. Энэ бол баярын бас бага зэрэг харууслын нулимс байх. Тэмцээн дээр өөрийгөө харуулна гэж найдаж байна" хэмээж байв. Үнэхээр л олон өдрийн турш түүнд ирсэн дарамт шахалт ердөө 15 настай охины хувьд ч төдийгүй өөр хэн нэгний хувьд ч тэсвэрлэшгүй хүнд даваа байсан юм.

Энэ дарамтыг Камила давж гарч чадсан ч түүнд нөлөөлсөн нь үзүүлбэрээс нь харагдаж байв. Камила үзүүлбэрээ эхлүүлэхдээ өмнө нь огт гарагж байгаагүй алдаа гаргасан бөгөөд тэрбээр гурвал аксель гүйцэтгэх үедээ степаут хийсэн юм. Гэхдээ үлдсэн хэсэгтээ ямар ч алдаа гаргалгүй, төгс гүйцэтгэл харуулж, гурвал флип, каскад лутц-тулуп хийснээрээ шилдэг гэдгээ харуулсан.

Үзүүлбэрийнхээ төгсгөлд нулимсаа барьж чадаагүй түүнд үзэгчид босож зогсон алга ташиж байлаа. Дасгалжуулагчидтайгаа уулзан, оноогоо хүлээхдээ сэтгэл түгшиж байсан түүнд шүүгчид хатуухан хандсан гэж олон хэвлэл бичжээ. Учир нь Камилагийн авсан 82,16 оноо түүний хувьд маш бага оноо аж. Энэ улиралд Камилагийн авсан хамгийн бага оноо нь энэ гэнэ. Гэсэн ч тэрбээр богино үзүүлбэрийн төрөлд тэргүүлэгч болж чадсан юм. 

Г.Бямбасүрэн