ОСНААУГ-ын Хэрэглэгчдэд үйлчлэх дөрөвдүгээр төвийн байцаагчийн айлд өгсөн албан мэдэгдэл өнөөдөр олон нийтийн сүлжээний тренд сэдэв болов. Тус мэдэгдэлд ус, дулааны төлбөрөө хугацаандаа төлөөгүй тохиолдолд Монголбанкны мэдээллийн санд оруулна хэмээн хэрэглэгчийг сүрдүүлжээ.

Энэ талаар эрх бүхий байгууллагаас ямар ч зохицуулалт хийгдээгүй байна. Монголбанк энэ асуудлаар ямар ч тушаал, шийдвэр гараагүй гэсэн тайлбарыг өгч байна. Тэгэхээр ОСНААУГ-ын даргаас эхлээд байцаагч хүртэл хэнд нь ч хэрэглэгчдэд ийм мэдэгдэл хүргүүлэх эрх байхгүй гэсэн үг. Монголбанк мэдээллийн сандаа оруулах эсэхээ шийдээгүй байхад оператор компанийнхан дур мэдсэн нь энэ аж.

ОСНААУГ-аас үйлчилгээний хураамжаа төлөөгүй хэрэглэгчийн мэдээллийг Монголбанкны мэдээллийн санд оруулах талаар 2020 онд Монголбанкинд ханджээ. Монголбанк судална гэсэн хариу өгсөн ч коронавирусийн нөхцөл байдлаас шалтгаалан ОСНААУГ-ын хүсэлт шийдэгдэхгүй хойшилсон байна.

Хүсэлт нь шийдэгдэхгүй, хойшилсоор байгаа учраас ОСНААУГ-ынхан өөр арга хэрэглэхийг хүссэн бололтой. Тиймдээ ч хууль бусаар, дур мэдэн хэрэглэгчээ сүрдүүллээ. ОСНААУГ-ын Гэрээ эрхзүйн мэргэжилтэн Р.Жамъяндорж “Нэг байцаагчийн үйлдэл” гэсэн тайлбарыг өгч байна. Өөрөөр хэлбэл хэрэглэгчдэд үйлчлэх дөрөвдүгээр төвийн байцаагч удирдах газартай мэдэгдэхгүйгээр хэрэглэгчдэд тийм мэдэгдэл өгсөн гэж байна. Тиймээс сануулга өгсөн гэнэ. Хэрвээ тайлбар бодит бол удирдах газар цаашлаад Монголбанкнаас том эрх мэдэлтэй байцаагч аж.

ОСНААУГ-ыг тойрсон асуудал мундахгүй олон. Засгийн газраас цар тахлын үед айл өрх, албан байгууллагад дэмжлэг үзүүлэх зорилгоор хэрэглээний төлбөрөөс чөлөөлсөн. Тог цахилгаан, ус дулаан, уур, хогны мөнгийг Эрдэнэт үйлдвэр төлсөн. Харин энэ дундаа ОСНААУГ-ын удирдах албан тушаалтнууд багагүй мөнгө “идсэн” хэрэг АТГ-т шалгагдаж буй. Айл өрх, албан байгууллагын ус, дулааны төлбөрт илүү бичилт хийх замаар төрөөс хоёр тэрбум төгрөг завшсан байж болзошгүй баримт бий.

Хэрэглэгчдэд үйлчлэх төвүүдийн дарга, нягтлан нартаа үүрэг өгч, ус дулааны төлбөрт илүү бичилт хийхийг даалгадаг албан тушаалтнууд хэрэглэгчийг мэдэгдлээр сүрдүүлэхийг бол энүүхэнд хийнэ. Хэрэглээний төлбөрийг төрөөс даасан халхавчин дор юу өрнөснийг хууль хяналтын байгууллага, хэрэглэгчдийн эрхийг хамгаалах газар анхааралдаа авахад илүүдэхгүй.

Б.Хэрлэн