Төрийн тэргүүний суудлаас эхлээд УИХ, Засгийн газрын танхимыг дүүргэсэн МАН-аас ард түмэн ихийг хүлээж буй. Тэр дундаа шударга бус байдалтай хийх тэмцлийг илүү чухалчилж, хэдийнэ бохирдож, шавар шавхайтайгаа хутгалдсан төрийг хэрхэн цэвэрлэхийг иргэд анхааралтай харж, ажиглаж байгаа. Ард түмний энэ хүлээлтийг МАН улс төрийн тоглоомондоо ч чамгүй сайн ашиглаж байна.

Эхлээд МАН дүрмэндээ өөрчлөлт оруулж, эерэг байдлыг үүсгэв. Авлига, албан тушаалын асуудалд орооцолдсон л бол өршөөхгүй гэж дүрмэндээ тусгалаа. Эрх баригч намын удирдлагууд ч дүрмийн энэ өөрчлөлтөө тоть мэт давтаж, нийгэмд багагүй хүлээлтийг үүсгэв. Гэвч МАН-ын хариуцлага тооцсон шийдвэр нийгмийн хүлээлтийг давсангүй. Олон нийтийн сүлжээний хэрэглэгчдийн тодорхойлсоноор МАН “шүдгүй арслан”-уудыг зайлуулж, жүжиг тавилаа.

 

МАН-ын хөөсөн УИХ-ын гишүүн асан Г.Солтан, Б.Ундармаа, Д.Дамба-Очир, Б.Батзориг, Д.Хаянхярваа нар аль хэдийн улс төрөөс арчигдсан хүмүүс. Хаана ч нэр дэвшсэн ард түмний дэмжлэгийг авахаасаа нэгэнт өнгөрсөн хар бараан түүхтэй хүмүүс гэсэн үг. Өөрөөр хэлбэл МАН хөөсөн, хөөгөөгүй ард түмэн тэднийг улс төрөөс зайлуулаад өгсөн.

Тэд мэдээж МАН-д тус нэмэртэй байсан нь ойлгомжтой. Наанадаж л таван тойргоос МАН-д УИХ-ын суудал авчирч байсан хүмүүс. Энэ удаа ч МАН-д хэрэг боллоо. Нийгэмд хүлээлт үүсгээд байсан намын дүрмийн өөрчлөлтөө хэрэгжүүлсэн нэр зүүхэд муу нэртэй, луу данстай тэд МАН-д тус нэмрээ үзүүллээ. МАН авлига, албан тушаалын хэрэгт холбогдсон хүмүүстээ хариуцлага тооцсон уу, тооцсон. Ард түмний амыг таглалаа.

Нийгмийн хүлээлт их өөр байлаа. Өөрөөр хэлбэл Хөгжлийн банкнаас зээл авсан гишүүдийн асуудал яригдана гэсэн хүлээлт байв. Эрх мэдэл, албан тушаалаа ашиглаж, ард түмний боломжийг хулгайлсан төрийн түшээдээс МАН-ын цэвэрлэгээ эхэлнэ гэж хүлээж байв. Гэвч эрх баригч нам хэдэн “шүдгүй арслан”-гаар туг тахиж, жинхэнэ асуудал яригдаж буй хүмүүсээс тайлбар авах төдийхнөөр аргацаахаар шийджээ.

МАН-д тайлбар өгөх хүмүүс

• УИХ-ын гишүүн С.Бямбацогт,

• УИХ-ын гишүүн Г.Амартүвшин

• УИХ-ын гишүүн Х.Ганхуяг

• УИХ-ын гишүүн Г.Дамдинням

• УИХ-ын гишүүн асан М.Билэгт

• УИХ-ын гишүүн асан А.Сүхбат

• БХБ-ын дэд сайд асан Ш.Лхамсүрэн 

• НИТХ-ын төлөөлөгч асан Ш.Үнэнбат

Үнэн хэрэгтээ эрх мэдэл, албан тушаалаа ашиглаж, ард түмний боломжийг хулгайлсан төрийн түшээдээс хариуцлага эхлэх ёстой. Тэдэнд хариуцлага тооцож байж дараагийн албан тушаалтнуудад сануулга, анхааруулга болох учиртай. Ард түмэн эрх баригч МАН-аас ийм л зүйлийг хүсэж байгаа.

Ард түмний нэрээр төрд сонгогдож, томилогдчихоод ард түмний боломжийг хулгайлаад байгаа хүмүүсээс салаагүй цагт МАН хичнээн уран донгодоод нэмэргүй. Ард түмэн улс төрийн жүжиг гэдгийг нь хангалттай харж, дараагийн сонгуулиар ямар дүн тавихаа ч бодоод эхэлсэн биз.

Б.Хэрлэн