Нийслэлийн хэмжээнд түгжрэлд нөлөөлж буй 59 сургуулийн цагийн хуваарьт өөрчлөлт орсон.Тодруулбал,  Их тойруу болон Яармагт байрлалтай 59 сургуулийн хичээл эхлэх цагт өөрчлөлт оруулахыг дэмжих эсэх талаарх санал асуулгыг хоёрдугаар сарын 16-ны 14:00 цагаас хоёрдугаар сарын 18-ны 14:00 цаг хүртэл авсан. Гурван өдөр үргэлжилсэн санал асуулгад нийт 7278 хүн саналаа өгчээ. Санал, асуулгад оролцогсдын 74.2 хувь нь тус саналыг дэмжсэн бол, үлдсэн 25.8 хувь нь дэмжээгүй байна. Ингэснээр өчигдөр буюу хоёрдугаар сарын 21-нээс эхлэн түгжрэлд нөлөөлж буй 59 сургуулийн цагийн хуваарьт өөрчлөлт оруулсан юм.

Цагийн хуваарийн өөрчлөлт:

• Сургууль 1 - 07:45 цагт хичээл эхлэх

• Сургууль 2 -08:15 цагт хичээл эхлэх

• Сургууль 3 -09:00 цагт хичээл эхлэх

Дээрх зохицуулалттай уялдуулан нийслэл дэх аж ахуйн нэгж, байгууллагын ажил эхлэх, тарах цагийн уян хатан болгох

• Ажил эхлэх цаг -07:00-10:00

• Ажил тарах цаг -16:00-19:00

07:00 цагт ажилдаа ирсэн бол 16:00 цагт тарж, 10:00 цаг ажилдаа ирсэн бол 19:00 цагт тарж болно. Байгууллага тус бүр цагийн бүртгэлээ уян хатан болгож, зохицуулалт хийх боломжтой.

Иймд нийслэлийн хэмжээнд  түгжрэлд нөлөөлж буй сургуулиудын цагийн хуваарийг өөрчилсөн нь түгжрэлд хэрхэн нөлөөлсөн талаар сурвалжиллаа.

10 дугаар хорооллын автобусны буудал. Хэдийгээр хаврын сар гарсан ч хүйтний эрч буурах болоогүй. Иргэд автобус хүлээж нааш цааш холхино. Тэд ажил, хичээлээсээ хоцрохгүйн тулд эхний автобусанд амжиж суух ёстой.

Сургуулиудын цагийн хуваарийг өөрчилсөн нь түгжрэлд нөлөөлсөн

МУИС-ийн оюутан Х.Буянхишиг:

-Түгжрэл өмнөх өдрүүдийг бодвол маш их байна. Би өнөөдөр 9.20 цагт хичээлтэй. Гэвч одоо 9.00 цаг болж байхад автобусандаа сууж амжаагүй л байна. Би гэрээсээ 7.30 цагт гарсан. Одоог хүртэл автобус хүлээж байна. Ирсэн автобуснууд зогсохгүй өнгөрч байна. Дүүрэн зорчигчтой харагдсан. Автобусанд суусан ч түгжрэл маш их байна. Манай дүү 12 дугаар ангид сурдаг. Өглөө 6.50 цагт гэрээсээ гарсан. Гэхдээ намайг автобусны буудал дээр гарч ирэхэд  автобусандаа сууж чадалгүй зогсож байсан. Дөнгөж сая автобусанд суусан ч автобус нь нэг ч буудал газар яваагүй байна. Дүүгийн маань сургуулийн хичээлийн цагийн хуваарь нь өөрчлөгдөж 8.15 цагт орохоор болсон. Магадгүй сургуулиудын цагийн хуваарийг өөрчилсөн нь түгжрэлд нөлөөлсөн байх.

Автобус зогсохгүй өнгөрч байна 

ЕБС-ийн дугаар сургуулийн сурагч Г.Ган-Эрдэнэ:

-Автобусаа хүлээж байна. Автобус ирсэн ч зогсохгүй өнгөрч байна. Бас түгжрэл их байна. Манай сургууль энэ долоо хоногоос эхэлж 8.15 цагаас орохоор болсон. Гэхдээ би хичээлээсээ хоцорчихсон. Хүйтэн байгаа болохоор алхаж болохгүй. Багшдаа автобус хүлээгээд хоцорч байгаагаа залгаж хэлсэн. Одоо ирэх автобусанд багтаж суугаад хичээлдээ очно.

Автобусны тоог нэмэх шаардлагатай 

Баянгол дүүргийн иргэн Д.Баттулга:

-Автобус нь хүрэлцэхгүй байна. Бас маш их түгжирч байна. Ээжийндээ ирж хоноод ажилдаа явж байгаа юм. Гэтэл өнөөдөр ажлаасаа хоцрох юм шиг байна. Автобусны тоог нэмэгдүүлэх шаардлагатай. Төр засаг түгжрэл шийднэ гэж ярьж байгаа ч хийж хэрэгжүүлсэн ажил алга. Сургуулиудын цагийн хуваарийг өөрчилж

Хүмүүс халдвар хамгааллын дэглэм баримтлах боломжгүй байна

Баянгол дүүргийн иргэн Д.Хүслэн: 

-Автобус хүрэлцэхгүй байна. Түгжрэл их байна. Хүмүүс халдвар хамгааллын дэглэмээ баримтлах боломжгүй.  Ер нь асуудлаа шийдэхгүй явсаар өнөөдрийн нөхцөл байдал үүсэж байна. Жилийн жилд нийслэлд амьдардаг хүмүүс түгжирч, цагаа зам дээр өнгөрөөж байна. 

М.Насан