"Усны төлөө иргэдийн нэгдэл" ТББ-аас “Монгол Улсын ундны усны хэрэглээ улаан түвшинд хүрч байна” сэдэвт хэвлэлийн хурал хийлээ. 

"Усны төлөөх иргэдийн нэгдэл" ТББ-ын тэргүүн З.Батбаяр "Бид усны нөөцийн хомстолд орсон гэдгээ дэлхий дахинаа зарлах цаг болжээ. Өөрөөр хэлбэл, ундны усны хэрэглээ улаан түвшинд ирсэн байна. Усны нөөцийн хомстлоос гарах арга замыг ярилцах хэрэгтэй. Усны нөөцийн хомстлоос гарах гурван үндсэн арга зам бий. 

• Ус хэмнэх

• Ус дахин ашиглах

• Усны нөөцийн хуримтлал бий болгох. 

Бид нэг үеэ бодвол ус хэмнэлттэй ашиглаж байгаа. Гэхдээ усны хэмнэлт нь  усны хомстлыг шийдэж чадахгүй. Усыг дахин ашиглаж байна. Харамсалтай нь энэ ч усны хомстлыг шийдэж чадахгүй. Тэгэхээр усны нөөцийн хомстлыг арилгах үндсэн арга зам нь усны хуримтлал бий болгох юм. Жишээлбэл, Туул гол тодорхой хугацаагаар тасалддаг. Туул голын ус тасалдах шалтгаан нь өвлийн улиралд газрын доорх усыг нь ховх сорсноос болсон. Туул гол газрын доорх усаа нөхөж чадахгүй байна. Тиймээс Туул голд далан барьж нөөц бүрдүүлэх хэрэгтэй. Бид усны талаар нэгдсэн ойлголтод хүрэх хэрэгтэй. Өнөөдрөөс эхлээд "Усны төлөөх иргэдийн нэгдэл" бүх талын үйл ажиллагаа явуулна" гэж мэдээллээ.

М.Насан