Нийслэлийн Засаг дарга Д.Сумъяабазар Улаанбаатар хотын эдийн засгийн чиглэлээр мэргэжлийн олон хүмүүстэй ажиллаж буйгаа хэллээ. Тэр дундаа Ерөнхий сайд асан М.Энхсайханыг хамтран ажиллахаар урьсан байна. Улаанбаатарын хөгжил, тэр дундаа хотын эдийн засаг гэсэн шинэ томъёолол, бодлого гаргах чиглэлээр хамтран ажиллах тухай хотын даргын саналыг экс Ерөнхий сайд М.Энхсайхан дэмжсэн байна.

Хотын дарга “Нийслэлийн 1.6 сая иргэн бол хотын эдийн засаг. Нэг иргэн ч хотын эдийн засгийг дэмжиж байгаа. Бид хөдөлмөрийн бүтээмжид суурилсан эдийн засагтай болох ёстой. Үүний тулд хувийн хэвшлийг бүх талаар дэмждэг тогтолцоог бүрдүүлэхийн төлөө зүтгэж байна.

Манай улсын эдийн засгийн 70 хувийг Улаанбаатар бүрдүүлдэг. Тиймээс уул уурхайгаас олж буй орлогыг хотын бүтээн байгуулалт, хөдөлмөрийн бүтээмж нэмэгдүүлэхэд хөрөнгө оруулалт хэлбэрээр оруулах хэрэгтэй" хэмээн ярилаа.