Ардчилсан намын даргын сунгаанд Ерөнхийлөгч асан Х.Баттулга, УИХ-ын гишүүн Ж.Батсуурь нар өрсөлдөх нь тодорхой болов. Дотоод Сонгуулийн Хорооноос зарласан сунгаанд тэд өрсөлдөхөөр материалаа хүргүүлээд байна.

Ерөнхийлөгч асан Х.Баттулгын хүсэлтийг Ардчилсан намын Хэрэг эрхлэх газрын дарга асан П.Нүрзэд уламжлав. Харин УИХ-ын гишүүн Ж.Батсуурь намын даргад өрсөлдөх хүсэлтээ өөрийн биеэр ирж өглөө. Тэрбээр Ардчилсан намыг ялалтад хүргэхийг хүсэж буйгаа илэрхийлэв.

Ерөнхийлөгчийн суудлаас бууснаас хойш нам жим байсан Х.Баттулга Ардчилсан намын даргын албан тушаалаар улс төрд эргэн ирэхийг хүслээ. Түүний хүсэлт олон нийтэд сонирхолтой байна. Нэг хэсэг нь Ардчилсан намыг самарна хэмээн дургүйцэж байхад нөгөө хэсэг нь улс төрийн эргэн ирэлт хэмээн алга ташиж байна.

Харин түүний энэ хүсэлтэд ардчилагчид таатай хандсангүй. Намын даргын сунгаанд бүртгүүлсэн даруйд АН-ынхан өөр өөрийн байр суурийг илэрхийллээ. Тухайлбал, Хууль зүйн сайд асан Х.Тэмүүжин өөрийн цахим хуудаснаа “Ардчилсан нам бодитойгоороо хуваагдах нь дээ!” хэмээн бичжээ.

Харин Төрийн соёрхолт Д.Сосорбарам "Баттулга аа чи одоо болноо зогс. Чи нам байтугай энэ улсыг самарсан. Путины гар хөлөөр үндэстнээ нураалгавал бидний л хохь болно. Гэвч Монголд эрүүл сэтгэхүй байгаа юм шүү. Чамд итгэсэн удаа надад бий. Харин ч сайн таньж авсан учраас МОНГОЛ үндэстэнд чи дэмий" гэж бичсэн байна.

Харин одоо С.Эрдэнэ ямар байр суурь илэрхийлэх нь сонин байна. Тэр дэмжихгүй нь тодорхой. МоАХ-ны тавдугаар их хурлын үеэр С.Эрдэнэ “Х.Баттулга ардчиллын хайрыг даагаагүй” хэмээн хэлж, “Баастай бурхан толгой дээрээ залах байсан бол 1990 оны хувьсгал хийх хэрэг юу байсан юм бэ” хэмээн ардчилагчдаас хариу нэхсэн. Тэгэхээр Х.Баттулгын АН-ын даргад өрсөлдөх хүсэлтийг С.Эрдэнэ таатайгаар хүлээн авахгүй мэдээж.

Угаас АН-ын асуудал өнөө ч цэгцрээгүй байгаа. Хоёр талд биенээ үгүйсгэж, УИХ, Улсын дээд шүүх рүү ээлжлэн бичиг барин, гүйлдэж буй энэ үед намын даргын сунгаа ч шулуун замаар өрнөхгүй. Үйл явц өрнөж болох ч үр дүнг ардчилагчид тийм ч амархан хүлээн зөвшөөрөхгүй нь эхнээсээ илэрч байна.

Хэрэв АН-ынхан нэр цэвэр гэвэл Ж.Батсуурийг сонгоно. Харин илүү ээдрээтэй, сонирхолтой улс төрийг хүсвэл Х.Баттулгын нэрийг дугуйлах нь тодорхой. Гэхдээ одоо АН-ынханд алдах эрх байхгүй. Дотроо учраа олохгүй явсаар сонгуулийн жил дундаа орлоо. Монголын улс төрийн хоёр том намын нэг гэсэн нэрээ авч үлдэх цаашлаад хүчтэй өрсөлдөгч болж, УИХ, Засгийн газарт өөрийн байр сууриа эзлэхэд даргын сонголт хамгаас чухал.

Ямартай ч хаврын улс төр халуухан бас ширүүхэн байх нь. Эрх баригч намд амлалтаа биелүүлэх цагийн тоолуур гүйж байгаа бол сөрөг хүчинд хүчээ зузаатгах өрсөлдөөн эхэлж байна.

Б.Хэрлэн