НАТО Владимир Путинийг эрх мэдлээс зайлуулах, бүхий л арга, тэр дундаа амь насанд нь халдах хувилбарыг судлах ёстой гэж Афганистанд Британийн цэргүүдийн командлагч байсан хурандаа Ричард Кэмп үзэж байгаа гэнэ. Тэрбээр энэ талаараа Британийн The ​​Mirror сонинд ярьжээ. Кэмпийн үзэж байгаагаар Оросын Ерөнхийлөгчийг хамгийн наад зах нь гэхэд л цэргийн гэмт хэрэгт буруутгах ёстой гэнэ.

"Путинийг түлхэн унагаж, баривчилж, Орост эсвэл Олон улсын шүүхээр шүүвэл сайн байхсан. Гэхдээ ийм хувилбарууд хэрэгжихгүй л болов уу" хэмээн Ричард Кэмп өгүүлжээ.

Олон хүний хувьд аллага тбайж болшгүй санаа мэт санагдав ч дайнд цэг тавьж, ирээдүйд гарах сөргөлдөөнөөс сэргийлэхэд ийм хувилбар цорын ганц үр дүнтэй арга байж мэдэхийг чөлөөндөө гарсан офицер онцолсон байна.

"Амийг нь хөнөөх дээрээ туллаа гэхэд энэ нь олон хүний хувьд таагүй санагдах байх. Гэхдээ Украинд болон бусад газарт алсан, ирээдүйд ч тэр хөнөөж  мэдэх олон мянган хүний аминаас түүний амь үнэтэй байна гэж үгүй" хэмээн Ричард Кэмп өгүүлжээ.

Тэрбээр, Британийн Засгийн газар Дэлхийн хоёрдугаар дайны үед Адольф Гитлерийг хөнөөхөөр төлөвлөж байсан, энэ төлөвлөгөө хэрэгжсэн бол 70 сая хүний амь сүйдэхгүй байх байсан хэмээн онцолсон байна.

" Усама бен Ладен, "Исламын улс" бүлэглэлийн толгойлогч Абу Бакр аль-Багдади мөн Ираны гвардын командлагч Касем Сулеймани нар бүгд л барууны орнуудад аюул заналхийлж байсан. Тэднийг ийм аюул тарихаас нь өмнө бүгдийг нь хөнөөсөн. Путин төрийн эрхэнд байх үедээ байнгын, үхлийн аюул заналхийлж байна. Түүнийг зайлуулахад туслах нь бидний эрхэм зорилт байх ёстой. Путиний олигархиудад хангалттай хэмжээгээр дарамт шахалт үзүүлвэл ордны эргэлт гарч болох юм" хэмээн Ричард Кэмп өгүүлжээ. 

Түүнтэй ойролцоо байр суурийг Украины Гадаад хэргийн сайд Дмитрий Кулеба илэрхийлж байлаа. Украины Гадаад хэргийн сайдын үзэж байгаагаар Путинийг "зайлуулах" нь Оросын түрэмгийллийг зогсооно, гэхдээ аюулгүй байдлын европын системийг сэргээхгүй гэнэ. Энэ дайн нь Путиний шийдвэр гэж үзэж байгаагаа Украины Гадаад хэргийн сайд илэрхийлсэн юм.

Г.Бямбасүрэн