Украинд дайн эхлэх тухай Оросын Ерөнхийлөгч Владимир Путиний шийдвэр, түүний эрүүл бус зан байдал нь эрүүл мэндийн шалтгаанаас үүдэлтэй байж болзошгүй гэнэ. Ийм таамаглалыг Австрали, Канад, Шинэ Зеланд, Их Британи, АНУ багтдаг "Таван нүд" тагнуулын эвслийн төлөөлөгчид дэвшүүлснийг  Daily Mail сонин мэдээлжээ. 

Тагнуулчдын үзэж байгаагаар, Путин хавдар өвчнийг эмчлүүлснээс үүдсэн "стероидын уур хилэн" гэгдэх эмгэгтэй болсон байж болзошгүй гэнэ. "Эрүүл бус үйлдэл, нүүр нь хавагнасан, ярилцах хүмүүсээсээ хэт хол сууж байгаа" зэрэг нь ийм дүгнэлт хийх үндэслэл болсон гэж эх сурвалж мэдээлжээ.

Путиний нүүр, хүзүү хавагнасан нь стероид удаан хугацаагаар хэрэглэснээс үүдэлтэй сөрөг нөлөө байж болзошгүй гэнэ. Түүнчлэн Путин удаа дараа "цонхигор" харагдаж байсан гэж тагнуулчид өгүүлснийг  Daily Mail сонин дамжуулсан байна. Мөн Путин Паркинсоны өвчин, деменци (мэдрэлийн эмгэг) өвчинтэй байж болзошгүй гэж эх сурвалжууд таамагласан байна.

"Сүүлийн таван жил орчмын хугацаанд тэрбээр шийдвэр гаргахдаа ихээхэн өөрчлөгдсөн. Тэр юу ярьж байгаадаа болон орчныг хүлээн авахдаа итгэлтэй байх байдал нь ихээхэн өөрчлөгдсөнийг ойр тойрныхон нь анзаарч байгаа" хэмээн Кремль дэх эх сурвалж мэдээлсэн байна.

Энд дуулгахад, сүүлийн жилүүдэд Путиний эрүүл мэндтэй холбоотой мэдээлэл барууны хэвлэлүүдээр удаа дараа гарч байсан ч Кремль тухай бүрт нь няцааж байлаа. Ийм мэдээллүүдээс заримыг нь дурдвал:

• 2020 оны 11 дүгээр сарын зургаан.ы өдөр Британийн The Sun сонин өөрсдийн эх сурвалжаас авсан мэдээлэлтэйгээр, 68 настай Путин өвчний улмаас төрийн тэргүүний албаа орхиж магадгүй хэмээн мэдээлж байв. Сонины эх сурвалжийн өгүүлснээр, хэвлэлүүдээр "Путиний нууц амраг" гэгддэг Алина Кабаева Путинийг ажлаа өгөхийг ятгаж байсан гэнэ. Кремль энэ мэдээллийг "огт хэрэггүй зүйл" гээд Путиний эрүүл мэнд маш сайн байгаа гэж мэдэгдэж байв. 

• Мөн оны есдүгээр сард Путинийг өвдсөн, химийн эмчилгээнд орох шаардлагатай байгаа гэж Путинтэй хамт суралцаж байсан, ЗХУ-ын Улсын аюулгүй байдлын хорооны тагнуулч асан Юрий Швец хэвлэлд ярьж байлаа.

• Түүнчлэн 2020 оны есдүгээр сард Оросын түүхч, улс төрийн тоймч Валерий Соловей "Путин давагдашгүй хүчин зүйлсийн улмаас 2022 оны улс төрд байхгүй" хэмээн ярьж байсан юм.

Энд дуулгахад, Владимир Путин 2000 онд ОХУ-ын Ерөнхийлөгчөөр сонгогдсон. Энэ албыг улиран хашсан тэрбээр 2008 онд ОХУ-ын Засгийн газрын тэргүүн болж, харин Дмитрий Медведев Ерөнхийлөгч болж байсан юм. Улмаар 2012 онд Путин дахин төрийн тэргүүнээр сонгогдсон бол 2018 оны ерөнхийлөгчийн сонгуульд ялалт байгуулж байв.

Г.Бямбасүрэн