Украины Ерөнхийлөгч Владимир Зеленский орос ээжүүдэд хандан мэдэгдэл хийжээ. Энэ мэдэгдлээ тэрбээр Телеграм хуудсанд байршуулсан байна. Зеленский мэдэгдлийнхээ үеэр орос ээжүүдийг хөвгүүд нь хаана яваа, тэдэнтэй юу тохиолдсоныг шалгаж мэдэж байхыг уриалжээ. 

"Хүүг нь Украины эсрэг дайн руу илгээсэн гэдгийг мэдэж байгаа ээж бүр хүүгээ хаана явааг шалгах ёстой. Тэр дундаа, хөвгүүдтэйгээ холбогдож чадахгүй байгаа ээжүүд, хүү нь амь үрэгдсэн гэж дуулсан ч цогцосыг нь авч чадаагүй байгаа ээжүүд сураг ажиг тавиарай. Интернетэд дугаар бий, та бүхэн түүгээр дамжуулан хөвгүүдтэй чинь юу тохиолдосн талаар мэдэж болно" хэмээн Зеленский мэдэгдсэн байна. 

Түүнчлэн тэрбээр Украин улс олон мянган цэргийг олзолно гэж тооцоолоогүй байсан гэдгийг онцолжээ.

"Бидэнд 13 мянга, эсвэл өөр хэдэн мянга ч бай алагдсан орос цэрэг хэрэггүй. Огт хэрэггүй. Бид энэ дайныг хүсээгүй. Бид гагцхүү энх тайвныг хүссэн. Та бүхэн эрх баригчдаасаа эмээдэг айдсаасаа илүү хүүхдүүдээ хайрлаасай гэж бид хүсэж байна" хэмээн Зеленский мэдэгджээ.

Хугацаат цэргийн алба хаагчдыг дайнд илгээснээ Орос нуусан уу?

ОХУ хоёрдугаар сарын 24-ний өдрөөс байлдааны ажиллагаа эхлүүлснээсээ хойш энэ "цэргийн ажиллагаанд" гагцхүү цэргийн жинхэнэ алба хаагчид оролцож байгаа, хугацаат цэргийн алба хаагчид огт оролцоогүй гэж мэдэгдсээр байсан юм. Гэсэн ч хүүгээ хугацаат цэргийн албанд үдээд, дайнд явсныг олж мэдэн цочирдсон ээжүүдийн талаарх мэдээлэл Украин болон Оросын хараат бус хэвлэлээр гарсаар л байна. 

Тухайлбал, гуравдугаар сарын 17-ны өдөр Оросын "Новая газета" сонинд хүүгээ хугацаат цэргийн албанд явуулсан ч дайнд оролцож явааг сонссон ээжийн талаарх мэдээлэл гарсан байна. Наталья Неронен хэмээх эмэгтэйн хүү өнгөрсөн долдугаар сард цэргийн албанд татагджээ. 

"Би Украинд дайн болно гэдэгт эцсээ хүртэл итгээгүй. Түүнчлэн энэ дайнд хугацаат цэргийн алба хаагчид байхгүй л гээд байсан. Энэ бүх өдрүүдийг би яаж туулсан гэж санана. Шөнө нь унтахгүй, тэнд хүүтэй минь юу тохиолдох бол гэж бодохоос л давж гарамгүй санагдаад. Холбоогүй байж байгаад хүү мань нэг ярьсан. "Ростик, наана чинь аймшигтай байна уу?" гэхэд хүү минь "Тийм ээ, ээж ээ, сөнөөгчид дээрээс бөмбөгдөж байна" гэж хариулсан. Дээрээс нь бөмбөгдөөд, энэ хүүхдүүд минь туулай шиг л хэдэн тийш гүйлдэж байна гэж төсөөлөхөөр л аймшигтай байсан. Юуны төлөө миний бяцхан хүү тэнд амь насаараа дэнчин тавьж байгаа юм бэ?" хэмээн Наталья Неронен ярьжээ.

Оросын зарим хэвлэлийн мэдээлснээр, хугацаат цэргийн алба хаагчийг Украин руу илгээсэн талаар Путинд илтгээгүй, улмаар Путин энэ талаар мэдсэнийхээ дараа цэргүүдийг эргүүлэн байршилд нь татахыг үүрэг болгосон гэнэ. Улмаар ойрын өдрүүдэд багтаан хугацаат цэргийн алба хаагчдыг анги нэгтгэлд нь эргүүлэн татна гэж эрх баригчид амалсан аж.

Г.Бямбасүрэн