ОХУ-ын Ерөнхийлөгч Владимир Путин Украин дахь дайны тактикаа өөрчилж, одоо нийслэлийг эзлэн авах биш харин өмнөд болон дорнод нутаг дэвсгэрийг эзлэхээр зэхэж байна гэж АНУ-ын Wall Street Journal сонинд нэрээ нууцалсан эх сурвалжууд өгүүлжээ. 

Орос улс Оросын баруун хэсэг болон Крымийн хойгийн хооронд "хуурай замын гүүр" гаргах, түүнчлэн Донбасс дахь хяналтаа өргөжүүлэхийн тулд Украины өмнөд болон дорнод нутаг дэвсгэрүүд рүү анхаарлаа хандуулах тактиктай байгаа гэж Байдены захиргаан дахь албан тушаалтнууд үзэж байгаа талаар эх сурвалж мэдээлсэн байна. Түүнчлэн ОХУ Украины хотууд руу буудсан хэвээр байгаа бөгөөд энэ нь төвийг сахисан статустай болгох зэрэг Оросын шаардлагыг Владимир Зеленский хүлээн авахаас аргагүй байдалд оруулах зорилготой гэж эх сурвалж үзэж байгаа гэнэ.

Төвийг сахисан байр суурь баримтлах Путиний шаардлагыг хүлээн авахгүй бол эзэлсэн бүхий л нутаг дэвсгэртээ хяналтаа алдахгүй байхыг хичээхийн дээр дайныг үргэлжлүүлж болзошгүй гэж нэрээ нууцалсан эх сурвалжууд өгүүлсэн байна.

Г.Бямбасүрэн