Украины цагдаагийн генерал Вячеслав Аброськин Мариуполь хотоос хүүхдүүдийг нүүлгэн шилжүүлж, оронд нь өөрийг нь барьцаалах санал гаргажээ. Тэрбээр энэ талаараа Фейсбүүк хуудсандаа бичсэн байна. 

"Өнөөдөр бүрэн сүйрсэн хотод олон хүүхэд үлдчихээд байна. Тэднийг одоо л аврахгүй бол ойрын өдрүүдэд амиа алдана. Цаг хугацаа цөөхөн үлдлээ. Оросын эзлэн түргэмийлэгчдэд хандан хэлэхэд Мариуполь хотоос хүүхдүүдийг нүүлгэн шилжүүлэх боломж олго, хүүхдүүдийн оронд намайг барьцаалахыг санал болгож байна. Хүүхдүүдийг цуглуулж, тэднийг хотоос гаргах ажлыг зохион байгуулахын тулд намайг Мариуполь хот руу оруулахыг гуйя. Би хотод гурван өдөр л болно. Хүүхдүүдийг гаргаад, сүүлийн пост дээр олзонд орно" хэмээн тэрбээр бичжээ.

Аброськин өөрийгөө цагдаагийн генерал, 2014-2018 онуудад Донецк мужид эзлэн түрэмгийлэгчдийг эсэргүүцэх ажиллагааг зохион байгуулж байсан гэж сануулсан байна. 

"Би танай хоригийн жагсаалтад багтсан. Та нар намайг эрэн сурвалжилж байгөа. Та нар намайг устгахын тулд миний амь насанд халдах оролдлого хийсэн. Танай олон арван хүн алагдаж, олон мянган хүнийг баривчлахад би оролцсон. Алдарт "Азов" хороонд хамгийн ойр хүмүүсийн нэг болох тэр генерал чинь бий байна. Энэ бол миний өөрийн санаачилга. Миний амь нас гагцхүү надад өөрт л хамаатай. Мариуполийн хүүхдүүдийн амиар өөрийгөө солихыг санал болгож байна" хэмээн Аброьскин бичжээ.

Мариуполийн нөхцөл байдал

Нөхцөл байдал нэн хүндэрсэн, оршин суугчид нь хоол хүнсгүй болсон Мариуполь хот бол Донецк мужийн хоёр дахь том хот. Энэ хотыг Оросын цэргүүд бүслэн, хэдэн талаас нь довтолсоор сарын хугацаа өнгөрч байна. Эндээс олон гэр бүл хүүхдүүдээ аван дүрвэж байгаа бол өдөр бүрийн бөмбөгдөлтөн дунд үлдэж, хонгилд амьдрах хүмүүс байсаар л байна.

ВВС агентлаг сурвалжлага хийх үеэр нутгийн оршин суугчид энэ агентлагт ярьснаар, дайн эхэлсэн эхний өдрүүдэд хэн ч өнөөгийн нөхцөл байдал үүснэ гэж итгээгүй, хэдэнтээ буудаж байгаад л явчихна гэж боддог байсан гэнэ. Ингээд байдал бишдэж, нөхцөл байдал хүндэрсэн үед ихэнх хүмүүс хотоос зугтахын оронд хотоо хамгаалахаар үлдсэн аж. Харин гэр бүлээ аврахаар хүүхдүүдээ аван дүрвэсэн хүмүүс Оросын бүслэлтийг даван гарч чадахгүй байгаа талаар хотын оршин суугчид ярьжээ. 

Мариуполь бол Азовын тэнгист байх Украины томоохон боомт хот. Энд хоёр том төмөрлөгийн үйлдвэр байх бөгөөд эдгээр үйлдвэрийн бүтээгдэхүүнийг Мариуполь боомтоос дэлхий даяар түгээдэг юм. 

Энэ хотод дайн эхэлсэн өдөр буюу хоёрдугаар сарын 24-ний өдөр л дулаан хангамж тасарсан бол гуравдугаар сарын хоёрны өдөр цахилгаан эрчим хүчгүй болжээ. Түүнчлэн үүрэн холбоо ч тасарсан байна. Улмаар гуравдугаар сарын зургааны өдрөөс хий тасалжээ. Ингээд хүмүүс хий, цахилгаан, холбоо харилцаагүй болсон байна. 

Мариуполь хотын оршин суугч ВВС агентлагт өгсөн ярилцлагадаа "Амиа алдсан хүмүүсийг яаж тоолж байгааг мэдэхгүй юм. Эхний өдрүүдэд зарим сайн дурын ажилтнуудад машин гарган өгч, тэд зам дээрээс цогцосуудыг зөөж байсан. Хүмүүс цогцосуудыг зам руу зөөж, вандан сандал дээр орхиод дараа нь ирж авч байлаа. Шарил хадгалах газарт зай үлдээгүй. Бид бүслэлтэд орсон тул шарилыг оршуулгын газар руу зөөж чадахгүй л байгаа" хэмээжээ.

Украины Ерөнхийлөгч Зеленскийн мэдэгдсэнээр, Мариуполь хотод 100 орчим мянган хүн үлдсэн, тэд хоол хүнс, ундны усгүй, эм тариагүй болсон бөгөөд хотод хүмүүнлэгийн хямрал нүүрлэсэн аж. 

Г.Бямбасүрэн