Украины Ерөнхийлөгч Владимир Зеленский ард түмэндээ хандан ээлжит мэдэгдлээ хийлээ. Тэрбээр даваа гарагт хийсэн мэдэгдлийнхээ эхэнд Киевийн ойролцоо байх Ирпень хотыг чөлөөлсөн талаар мэдээллээ. 

Хэдийгээр хотыг чөлөөлсөн ч энэ хэсэг дэх аюулгүй байдлын талаар ярихад эрт байна, байлдааны ажиллагаа үргэлжилж байгаа хэмээн Зеленский сануулсан байна. Мөн Оросын цэргүүд Киев мужийн хойд хэсгийг хяналтдаа оруулсан хэвээр байгааг онцолжээ. 

Түүнчлэн байлдааны ажиллагааны үеэр 143 хүүхэд амиа алдсан талаар Зеленский мэдэгдсэн байна. Зеленскийн өгүүлснээр даваа гарагт дүрвэгчид болон хүмүүнлэгийн тусламж хүргэх нэг ч коридор ажиллаагүй гэнэ. Үүнд  Оросын цэргүүд буруутай хэмээн Украины Ерөнхийлөгч мэдэгджээ. Харин энэ мэдэгдлийн дараа Оросын тал Украины цэргүүд хүмүүнлэгийн коридорт саад болсон хэмээн мэдэгдсэн байна. 

Италийн Ерөнхий сайд Марио Драги зэрэг барууны хэд хэдэн орны тэргүүнтэй ярилцсан талаараа Зеленский энэ мэдэгдлийнхээ үеэр мэдэгджээ. 

“Итали улс бидний боловсруулж буй баталгааны шинэ системийн дагуу Украины аюулгүй байддлын баталгааны нэг болохоор зөвшөөрсөн” хэмээн онцолсон байна. 

Түүнчлэн Оросын эсрэг тавьсан хориг арга хэмжээний үр ашгийг судлах шинжээчийн бүлэг байгуулснаа Зеленский зарлалаа. 

“Хориг арга хэмжээнүүд үндсэн зорилтдоо хүрэхүйц хэмжээгээр ажиллах нь бидний зорилго. Ийм хориг арга хэмжээнүүдийг тойрч гарах боломжгүй байдал бий болгох нь бидний зорилго” хэмээн Зеленский мэдэгджээ. 

Түүнчлэн дайн эхлэхээс өмнөх барууны бодлогод сэтгэл ханамжгүй байгаагаа илэрхийлсэн байна. 

“Орос улс химийн зэвсэг ашигласан тохиолдолд Европ руу Оросын газрын тос нийлүүлэхэд хориг тавих зэргээр хориг арга хэмжээг чангатгана гэх мэдээлэл олон гарч байна. Үнэндээ хэлэх үг алга. Энэ бүхэн юунд хүргэснийг бодоод үз дээ. Химийн зэвсэг хэрэглэхийг хүлээх нь. Бид амьд хүмүүс, гэтэл ийм юм болохыг хүлээх нь. Оросын цэргүүдийн хийсэн бүхний төлөө газрын тосны хориг тавьчихаж болохгүй гэж үү?” хэмээн Зеленский мэдэгджээ. 

Ирпенийг чөлөөлсөн нь

Киев мужийн Ирпень хотыг чөлөөлсөн талаар Украины Ерөнхийлөгч ийнхүү мэдэгдэхийн өмнө хотын дарга Александр Маркушин хот чөлөөлөгдсөн талаар мэдэгдэж байлаа.

"Украины Зэвсэгт хүчин, нутаг дэвсгэрийн хамгаалалт, Үндэсний цагдаа, цагдаагийн тусгай хэлтсүүд, Тагнуулын ерөнхий газарт талархал имлэрхийлье. Бид хамтдаа байхдаа хүчтэй" хэмээн Марушкин мэдэгдсэн юм.

Хэдийгээр хотыг чөлөөлсөн ч хот руу эргэн ирж болохгүй, аюултай нөхцөлд байгаа хэмээн Александр Марушкин анхааруулсан байна.

Г.Бямбасүрэн