ОХУ-ын Ерөнхийлөгч Владимир Путин хоёрдугаар сарын 24-ний өдөр "тусгай цэргийн ажиллагаа" явуулах тушаал өгснөөс хойш Оросын цэргүүд Украин руу довтолж, Украины тал хариу эсэргүүцэл үзүүлэн, байлдааны ажиллагаа өрнөсөөр сар гаруйн хугацаа өнгөрөөд байна. Энэ хооронд талууд хэдэнтээ хэлэлцсэн ч төдийлөн үр дүнд хүрж чадсангүй. Хамгийн сүүлд гуравдугаар сарын 29-ний өдөр ОХУ, Украины хэлэлцэгчдийн нүүр тулсан уулзалт Туркийн Стамбул хотод болсон нь нааштай үр дүнд хүрч болзошгүйг илэрхийлэх дохио өгсөн хэмээн гадны ажиглагчид үзэж байна. Түүнчлэн Орос Украинд ихээхэн ялагдаж байгаа, Путинд ойрын хүрээлэл нь ташаа мэдээлэл өгч байгаагийн улмаас Орос байлдааны ажиллагаагаа зогсоохгүй байна гэсэн мэдээлэл удаа дараа гарч байлаа. Энэ удаад ийм байр суурийг АНУ илэрхийлжээ. 

Тодруулбал, Оросын Ерөнхийлөгч Путин Украинд болж буй үйл явдлын талаар мэдээлэл муутай байгаа гэж Цагаан ордон дүгнэж байгаатай Америкийн Батлан хамгаалах яам санал нэгтэй байгаа гэж Пентагоны төлөөлөгч Жон Кирби сэтгүүлчдэд мэдээлсэн байна. 

Өмнө нь Цагаан ордны төлөөлөгч Кейт Бедингфилд мэдээлэл хийхдээ Путиний хүрээлэл түүнд үнэнийг ярихаас эмээж, байлдааны ажиллагаа болон хориг арга хэмжээнээс үүдэлтэй эдийн засгийн хохирлын талаар худал мэдээлэл өгч байна хэмээн онцолж байв. 

Ийм дүгнэлт өгсөн нь үнэний талтай бөгөөд энэ нь сэтгэл түгшээж байна гэж Пентагоны төлөөлөгч Кирби мэдэгджээ. 

"Энэ бол түүний арми. Түүний дайн. Тэр үүнийг сонгосон. Түүний цэргүүд Украинд хэрхэн бүтэлгүйтэж байгааг тэр эцсээ хүртэл ойлгохгүй байна гэдэг нь зарим талаар болгоомжлол төрүүлж байна" хэмээн Кирби мэдэгджээ. 

Пентагоны төлөөлөгчийн өгүүлснээр, Путин мэдээлэл муутай байгаа нь сөргөлдөөнийг зогсоох хэлцлийн үеэр буруу шийдвэр гаргахад нөлөөлж болзошгүй гэнэ. 

“Нөхцөл байдал тун тааруу байгаа талаар тэр бүрэн мэдээлэл аваагүй нөхцөлд хэлэлцэгчид нь хэрхэн тохиролцоонд хүрэх вэ?” хэмээн Кирби өгүүлсэн байна. 

Орос амлалтдаа хүрээгүй, гэхдээ...

 
Гуравдугаар сарын 29-ний өдөр болсон хэлцлийн дараа Оросын тал Киевийн хойд хэсэг дэх байлдааны ажиллагаагаа бууруулна гэж мэдэгдэж байлаа. Гэсэн ч гуравдугаар сарын 30-ны өдрийн байдлаар цэргээ эргүүлэн татсан тохиолдол тун цөөн, энэ нь байлдааны ажиллагааг бууруулах гэсэндээ биш цэргүүдээ сэлгэн байршуулж, өөр талаас довтолж болзошгүйг илэрхийлж байж болзошгүй гэж АНУ үзэж байгаа юм. Харин гуравдугаар сарын 30-ны үдэш гарсан мэдээллээр Оросын цэргүүд Чернобылийг орхиж эхэлсэн гэнэ. 

Тодруулбал, Оросын цэргүүд Чернобылийн атомын цахилгаан станцыг орхиж, Беларусийн нутаг дэвсгэр рүү хөдөлж эхэлсэн талаар Пентагоны нэрээ нууцалсан эх сурвалж Франц Пресс, Аль-Арабия гэсэн хэвлэлүүдийн сэтгүүлчдэд мэдээлсэн байна. 
“Чернобыль бол Оросын тал цэргүүдийнхээ хэсгийн байршлыг өөрчилж буй газруудын нэг. Цэргүүд Чернобылиэс Беларусь руу явж байна. Тэд одоо бүгд явсан гэж хэлж чадахгүй” хэмээн эх сурвалж Франц Прессд өгүүлсэн байна. 

Энд дуулгахад, Оросын цэргүүд дайн эхэлсэн өдөр буюу хоёрдугаар сарын 24-ний өдөр л Чернобылийг хяналтдаа оруулсан юм. 

Ийнхүү Чернобылийн нутгаас Оросын цэргүүд хөдөлж байгаа шинж тэмдэг ажиглагдсан бол бусад газарт байлдааны ажиллагаа зогсоогүй талаар ВВС агентлаг мэдээлсэн байна. Эх сурвалжийн мэдээлснээр, ОХУ байлдааны ажиллагаагаа сааруулах амлалт өгсөн ч  Черниговск муж руу Оросын арми довтолсон хэвээр байгаа талаар тус мужийн захирагч Вячеслав Чаус мэдэгджээ. 

Гуравдугаар сарын 30-ны өдөр энэ муж руу тасралтгүй довтолсны улмаас орон сууц, дэд бүтэц, номын сангийн барилгууд, худалдааны төвүүд эвдэрсэн байна. 

Киев мужийн Бучанск дүүрэгт ч нөхцөл байдал хүнд байгаа аж. Энэ мужийн Ирпень хотыг чөлөөлсөн гэж саяхан мэдэгдэж байсан ч энд байлдаан үргэлжилсээр байгаа гэнэ. 

Г.Бямбасүрэн