Украины Ерөнхийлөгч Владимир Зеленский үдэш бүр хийдэг ээлжит мэдэгдэлдээ Киевийн ойролцоо гарсан хэрэгтэй холбоотойгоор ихэд бухимдаж байгаагаа илэрхийлжээ. 

"Манай газар нутаг дээр харгислал үйлдэж байна. Алуурчид, зандалчид, хүчирхийлэгчид, дээрэмчид өөрсдийгөө арми гэж нэрлэж байна. Тэд хийсэн үйлдлийнхээ төлөө үхэх ёстой. Орос цэргийн ээж бүхэн Буча, Ирпень, Гостомельд алагдсан хүмүүсийн цогцосыг хараасай гэж би хүсэж байна. Тэд юу хийчихэв ээ? Яагаад хөнөөв өө? Гудамжаар дугуй унан явж байсан эр юу хийсэн юм? Энгийн нэгэн тайван хотод энгийн иргэдийг яах гэж тамлав аа? Эмэгтэйн чихнээс ээмгийг нь дээрэмдэж аваад яах гэж дараа нь боож алав аа?" хэмээн Зеленский мэдэгдсэн байна. 

Түүнчлэн Оросын цэргүүд энгийн иргэдийг хөнөөхийн зэрэгцээ хүчирхийлэл үйлдэж байгаа гэсэн мэдээлэл ч хэвлэлүүдээр гарч байсан. 

"Хүүхдүүдийнх нь нүдэн дээр эмэгтэйчүүдийг хүчирхийлж, хөнөөж яаж чадаж байна аа? Амиа алдсаных нь дараа ч цогцосыг гутаан доромжилж яаж чадаж байна? Хүмүүсийн цогцосон дээгүүр яах гэж танкаар дайрсан юм? Украины Буча хот танай Орост ямар гай тарьсан юм? Оросын ээжүүд ээ! Та нар дээрэмчин өсгөж хүмүүжүүлсэн байлаа гэж бодоход тэд дээр нь, яаж яваад зандалчид болчихов оо? Та нар хүүхдүүдээ мэдэхгүй байна гэж байхгүй. Тэд хүний гэх бүхнээ гээж байгааг анзаарахгүй өнгөрсөн гэж байхгүй. Тэд сэтгэл зүрхгүй, зориудаар, таашаал авч хүн хөнөөж байна" хэмээн Зеленский мэдэгджээ. 

Түүнчлэн тэрбээр ОХУ-ын удирдлагууд цэргүүд нь  тушаал хэрхэн гүйцэтгэж байгааг бүгд хараасай гэж хүсэж байгаагаа илэрхийлсэн байна. Мөн эдгээр гэмт хэрэг, тамлал, аллага, хүчирхийллийн төлөө бүгд хариуцлага хүлээх ёстой гэж мэдэгджээ. 

Энд дуулгахад, Оросын арми Беларусийн хил рүү ухарснаас хойш Украины цэргүүд Буча хотыг эзлэсэн бөгөөд энэ үйл явдлын дараа олон нийтийн сүлжээгээр Буча хотын гудамжинд олон цогцос хэвтэж байгааг харуулсан гэрэл зураг, дүрс бичлэг цацагдах болсон юм. Бямба гарагт энэ хотод гадаадын хэвлэл мэдээллийн сурвалжлагчид очиж, энэ хотын гудамжинд олон тооны цогцос байгааг баталсан байна.

Эх сурвалжуудын мэдээлснээр, гудамжинд байх цогцосууд нь энгийн хувцастай, энгийн оршин суугчид байсан гэх бөгөөд зарим цогцосыг танилууд нь харж таньсан гэнэ. Амиа алдсан эдгээр хүмүүсийн зарим нь суманд өртөж, эсвэл минад оногдож амиа алдсан нь илт байх бол гарыг нь хүлсэн цогцос ч байсан бөгөөд эдгээр хүмүүсийг Оросын цэргүүд буудсан байх гэж Украины Ерөнхийлөгчийн захиргааны зөвлөх Михаил Подоляк мэдэгдсэн байна. 

Харин эдгээр мэдээллийг Оросын тал үгүйсгэж байгаа юм. ОХУ-ын албаны төлөөлөгчдийн мэдэгдсэнээр, Оросын цэргүүд хотоос гарснаас хойш дөрөв хоногийн дараа ийм мэдээлэл гарсан гэнэ. 

Г.Бямбасүрэн