УИХ-ын дарга Г.Занданшатар Засгийн газраас эхлээд ард түмэн хүртлээ хэмнэлтийн горимд шилжихийг удаа дараа анхааруулав. Тэрбээр УИХ-ын чуулганы өнгөрсөн долоо хоногийн пүрэв гаригийн хуралдааны төгсгөлд “...Засгийн газар бүхнийг чадагч бурхан тэнгэр биш. Төсөв мөнгө хязгаартай. Бидний олж байгаа орлого хязгаартай. Тиймээс нийт ард иргэд хэмнэлтийн горимд шилжиж, дэлхий даяар болж буй үйл явдлын Монголд туссан сүүдрийг ойлгож, улс төрийн хүчнүүд ч улстөржихгүй, асуудалд бодитой хандах хэрэгтэй” хэмээн хэлсэн.

Түүний үг төрийн түшээд ард түмний амьдралыг мэддэггүйн бодит жишээ болов. Ард түмэн амьдрах биш амь зогоож байна. Хотын захад олон хүн хоосон хонож, ноорхой гэрт даарч байна. Иргэдийн ихэнх нь өнөө маргаашийг арай ядан аргацааж байна. Хэмнэе гэсэн ч хэмнэх юу ч байхгүй.

Өнгөрсөн баасан гаригт 350 төгрөгийн үнэтэй байсан өндөг ням гаригт 500 төгрөг болон өсөв. УИХ-ын гишүүн Н.Алтанхуягийн хэлж байснаар өндөг тансаг хэрэглээ болсон нь энэ. Сүү ХК-ийн сүү 4000 төгрөгийн үнэд хүрлээ. Талх 2000 төгрөг давсан. Өдрийн хэрэглээний сүү, талх, өндгөнд 10 мянган төгрөг хүрэлцэхгүй. Тэгвэл өдөрт 10 мянган төгрөгийн орлогогүй мянга мянган хүн бий. Тэднээс хэмнэлт шаардах нь хоосон хоно гэж хэлж байгаатай ялгаагүй.

Пүрэв гаригт ард түмнийг хэмнэлт хийхийг сануулсан УИХ-ын дарга баасан гаригт үгээ зөөлрүүлэх гэж оролдов. Засгийн газар, төсвийн байгууллагууд, төрийн өмчит ААН-үүд, уул уурхайн компаниуд бүгд хэмнэлтийн горимд шилжих хэрэгтэй.  Яам, тамгын газрууд илүү зардал гаргаж, худлаа судалгаа хийж, төсвийн мөнгө үрж таарахгүй. Тэвчиж болох бүх зардлыг бууруулахад Засгийн газар, яам, тамгын газрууд анхаарах хэрэгтэй” гэж төрийнхөнд анхааруулга өгөв. Харин энэ үг бол бэлгэ тэмдэг төдий, цуурхай шиг л сонсогдов. Ямар ч хүнд хэцүү цагт төрийнхөн хэмнэлт хийдэггүй. Ил, далдаар тансагласаар байдгийг ард түмэн мэддэг болсон. Төрийн өндөр сэнтийнээс хичнээн удаа хэмнэлт хийхийг шаардсан ч төрийн байгууллагууд өндөр шилэн барилга барьж, ширээ сандлаа шинэчилж, шаардлагагүй албан тушаал бий болгож, танил тал, хамаатан саднаа ажил авч, дайллага цайллага зохион байгуулж л байдаг. Өнөө маргаашийн амьдралаа арай ядан залгуулж, амь зогоож буй ард түмнээ тавлаж буй мэт.

“Алсын Хараа-2050” Монгол Улсын урт хугацааны хөгжлийн хөтөлбөрт дундаж давхаргыг зузаатгах зорилго бий. Бүр чинээлэг дундаж давхарга зонхилсон нийгмийг бий болгох тухай тусгасан. Өнөөдрийн нөхцөл байдлаас харвал энэ зорилго мөн л цаасан дээр үлдэх нь тодорхой. Дундаж давхарга зонхилох биш өнөөдрийн дундаж давхаргынхан ядуурлын түвшин руу унаж, эргэж сэхэхгүйгээр живэх нөхцөл байдалд орчихоод байхад төрийн өндөр сэнтийгээс хэмнэлт хий хэмээн хэлэх нь хэр зохимжтой вэ.

Ард түмний амьдралыг сайжруулах нэг ч үйлдэл хийдэггүй, ядаж ганц үйлдвэр ашиглалтад оруулж чаддаггүй төр засагтай байх ямар их гаслам вэ!

Ард түмэн амьдраагүй, амь зогоож байгаа шүү, төрийн түшээд ээ!

Б.Хэрлэн