Монгол Улсын Ерөнхийлөгч У.Хүрэлсүх Өндөр хатуулагтай архины хэрэглээг бууруулах тухай Ерөнхийлөгчийн зарлиг гаргажээ. Зарлигийг Ерөнхийлөгчийн зөвлөх Т.Мөнхсайхан танилцуулж байна. 

Манай улсын 21-ээс дээш насны нэг хүнд 55 литр согтууруулан ундаа ногдож байна. Үүнээс 12 литр нь спирт байна. Энэ нь ДЭМБ-аас тогтоосон дундажаас хоёр дахин өндөр байна. ДЭМБ нэг хүнд ногдох согтууруулах ундааны хэмжээ 8-9 литрээс дээш байвал үндэсний аюулгүй байдалд аюул учирна гэж үздэг.

Манай улс архины шалтгаант нас баралт болон архины зохисгүй хэрэглээгээрээ манай улс дэлхийд тэргүүлж байна. Манай улсад согтууруулах ундааны хэрэглээ жил ирэх тусам нэмэгдэж, тэр дундаа өндөр градустай согтууруулах ундааны хэрэглээ хамгийн өндөр түвшинд байна. Манай улсад 21-ээс дээш насны 90 мянган хүн архины донтолттой байгааг Т.Мөнхсайхан зөвлөх танилцууллаа. 

Нийгэм үйлдэгдэж буй гэмт хэрэг, зөрчил, эрүүл мэндийн хохирлын гол шалтгаан нь 38-40 градусын өндөр хатуулагтай согтууруулах ундаа болж байна. Тухайлбал, согтууруулах ундаа хэрэглэсэн үедээ хүний амь нас хөнөөсөн хэрэг жил ирэх тусам нэмэгдэж байна. Дундажаар 60 хувьтай байдаг байсан бол 2022 онд 88.7 хувь болон өсчээ.

Согтууруулах ундааны хэрэглээг зөв зохистой болгодог хамгийн үр дүнтэй арга бол татварын бодлого. Тиймээс онцгой албан татварын хуулийг судлахад согтууруулах ундааны дийлэнх хувийг эзлээд байгаа 38-40 градусын архины татвар 26 градустай согтууруулах ундаанд ногдох онцгой албан татвартай ижил хэмжээнд байна. 25-40 градусын согтууруулах ундааны онцгой албан татвар 6960 төгрөг байна. Тиймээс согтууруулах ундааны онцгой албан татварын зохицуулалт хийх шаардлагатайг хэлж байна. Онцгой албан татварыг 10 хувиар нэмэгдүүлэхэд архины хэрэглээ 8 хувиар, шар айрагны хэрэглээ 5 хувиар буурсан байна. АНУ-ын судалгаагаар татварыг 10 центээр нэмэгдүүлэхэд авто осол 7 хувиар, элэгний хатуурал 32 хувиар буурчээ.