Ерөнхий сайд Л.Оюун-Эрдэнэ Хөгжлийн банкны дараа Эрдэнэс Монголын асуудлыг ил болгохоо хэллээ. Энэ тухай Л.Оюун-Эрдэнэ "Эрдэнэс Монголтой холбоотой маш олон охин компани байгаа. Тэнд тус бүрт нь ТУЗ байгаа. Тэнд төрөөс гадна, хяналтгүй маш их хэмжээний мөнгө эргэж байгаа. Х.Нямбаатар сайдаар ахалсан ажлын хэсэг гарсан. Тавантолгойн нүүрсийг сүүлийн 17-20 жилийн хугацаанд уурхайн аман дээрээс 60 ам.доллараар гаргаж, хилийн цаана 120-180 ам.доллараар зарж, дундаас нь 60-70 ам.доллар завшсан бүлэглэлийг илрүүлэх ажлын хэсэг байгуулсан. Энэ далд эдийн засаг цэгцрэхэд Монгол Улсын ДНБ 2 дахин тэлнэ. 

Тэнд маш их хэмжээний автомашин байгаа. Автомашин дотор манай парламентын нэр бүхий гишүүд холбогдсон, А.Адьяасүрэнгээс эхлээд. Цаанаас нь нөлөө бүхий лидерүүд гарч ирнэ. Цаашлаад Баяннуур аймагт байгаа нөлөө бүхий хүмүүстэй холбогдоно. Татвар төлдөггүй, хэн ч бүртгэдэггүй далд эдийн засаг Гашуунсухайтын төмөр замыг 10 гаруй жил гацаасан. Учир нь тэдэнд маш их ашигтай байсан. Тун удахгүй автомашины том жагсаал болно. Үүнд битгий хөтлөгдөөрэй, зарим үед хатуу байж шинэ 30 жилийн эхлүүлнэ.

У.Хүрэлсүх Ерөнхий сайд надад ажлаа өгөхдөө “Ерөнхий сайд гэдэг яс янгидаг ажил шүү” гэж хэлсэн. Цаг үе ингэж таараад ч байна уу, үнэхээр яс янгинах өдрүүдэд ирэх юм. Гэхдээ би хэзээ ч огцрохоос айхгүй. Харин шударга бустай эвлэрч, улс төрийн үхдэл болохоос айна” гэдгийг хэллээ.

Мөн Ерөнхий сайд Төрийн өмчит үйлдвэрийн газруудыг цэгцлэх цаг болсныг хэлж байна. Төрийн өмчит үйлдвэрийн газрын зарим асуудлыг олон нийтийн шууд хяналтад оруулах асуудлыг шийдвэрлэнэ. Энэ асуудлуудыг цэгцэлчихвэл Монгол Улс авлигын индексээрээ 2 оронтой тоо руу орно. Хөрөнгө оруулалтын орчин сэргэнэ. Хөрөнгө оруулагчид Монгол Улсад хөрөнгө оруулахдаа итгэнэ" гэдгийг Ерөнхий сайд хэллээ. 

Б.Хэрлэн