Залуусын жагсаалын талаарх УИХ-ын гишүүдийн байр суурь
Залуучууд төр, засгийг ажлаа сайн хийхийг шаардан, эх орондоо сайхан амьдрахыг хүсэж, өчигдрөөс Сүхбаатарын талбайд тайван жагсаал хийж байна. Жагсаал шөнө хүртэл үргэлжилж, цагдаагийн байгууллагаас албадан тарааж, цөөнгүй залуусыг саатуулаад байна. Залуусын эсэргүүцэл, өрнөж буй үйл явдалд УИХ-ын гишүүд чуулганы үеэр ямар байр суурь илэрхийлснийг хүргэж байна.
УИХ-ын гишүүн Б.Пүрэвдорж: Залуус УИХ, Засгийн газар, төр засгийг ажлаа хий гэж уриалж, жагсаал зохион байгууллаа. Ардчиллын хамгийн чухал хэрэгсэл болон үг хэлэх, жагсах цуглах эрх чөлөөгөө эдэлсэн. Харамсалтай нь шөнө хүчээр тараасан. Цагдаа жагссан хүмүүст хүч хэрэглэсэн байж магадгүй нь харагдаж байна. Саатуулагдсан 67 хүнийг яаралтай гаргахыг АН-ын бүлгийн зүгээс шаардаж байна. Хүүхдүүд, эмэгтэйчүүдийг гаргах хэрэгтэй. Асуудлыг хүчээр шийдэх тусам энэ хүмүүсийн эрх чөлөө илүү хүчтэй байх болно гэдгийг анхааруулъя.
УИХ-ын гишүүн Т.Доржханд: Маш олон залуус Монголдоо сайхан амьдармаар байна. Зүгээр ажлаа хийгээд өгөөч ээ, хэмнэхээр бол өөрсдөө хэмнээч гээд эсэргүүцлийн жагсаал хийлээ. Иргэдийн эвлэлдэн нэгдэх, үгээ хэлэх, үзэл бодлоо илэрхийлж, тэр дундаа залуучууд нийгмийн амьдралд оролцож байгаа энэ үйлдлийг дэмжих ёстой. Хязгаарлаж болохгүй. Саатуулагдаад байгаа залуусыг яаралтай суллах хэрэгтэй. УИХ үүнийг анхаарах хэрэгтэй. Засгийн газарт яаралтай чиглэл өгөх хэрэгтэй. Тайван жагсаалд хүндэтгэлтэй хандаж, ардчиллаа хамгаалах ёстой. Эдийн засгийн зөв бодлого явуулаач гэж хүсэж байна. УИХ маш яаралтай арга хэмжээ авах хэрэгтэй байна.
УИХ-ын дарга Г.Занданшатар: УИХ-ын даргын захирамжаар үүсээд буй нөхцөл байдалтай холбогдуулан авах арга хэмжээний төсөл боловсруулах ажлын хэсэг байгуулж байна. Ажлын хэсэгт Т.Доржханд гишүүнийг орж ажиллахыг урьсан. Сөрөг хүчин, эдийн засагчдын төлөөллийг тэгш байдлаар оруулахыг эрмэлзэж байна.
Нийгмийн бухимдал өндөр байгааг ойлгож байна. Нийгмийн бухимдлаас үүдэлтэй жагсаал цуглааны нөхцөл байдлыг ойлгож, хүндэтгэлтэй хандаж байна. Үүний дагуу байгуулсан ажлын хэсэг
-
Засгийн газраас өргөн мэдүүлсэн олон улсын хямралт нөхцөл байдлаас үүдэлтэй гол нэр төрлийн бараа бүтээгдэхүүний үнийн өсөлт, хомстолоос сэргийлэх хуулийн төсөл
-
Үүсээд буй нөхцөл байдлын бодлогын шийдлийг ярилцана.
Ажлын хэсэгт УИХ-ын гишүүн Х.Булгантуяа, Ч.Хүрэлбаатар, Т.Доржханд, Б.Чойжилсүрэн, Ж.Ганбаатар, Б.Пүрэвдорж, Ч.Ундрам нар багтлаа. Даргын зөвлөлийн хурлаар ажлын хэсгийн үйл ажиллагааг хэлэлцэнэ.
Б.Хэрлэн
СЭТГЭГДЭЛ БИЧИХ