Өнгөрсөн амралтын өдрүүдэд дэлхий даяар олон жагсаал цуглаан өрнөлөө. Эдгээрийн ихэнх нь Украин, Оросын дайныг эсэргүүцсэн агуулгатай болсон бол Словакт болсон жагсаал Украинд зэвсэг нийлүүлэхийг, Монголд болсон жагсаал Оросыг дэмжсэн өнгө аястай болж өнгөрлөө. 

Германд Оросыг дэмжсэн, эсэргүүцсэн жагсаалууд боллоо

Хоёрдугаар сарын 24-ний өдөр Оросын Ерөнхийлөгч Владимир Путин "тусгай цэргийн ажиллагаа" эхлүүлэх тушаал өгснөөр Оросын арми Украин руу довтолж эхэлсэн юм. Энэ үеэс хойш л дэлхийн олон оронд дайн эсэргүүцсэн жагсаал цуглаан өрнөсөөр өнөөдрийг хүрэв. Өнгөрсөн амралтын өдөр Германы  Майны Франкфурт хотод Оросын өдүүлсэн дайны эсрэг, Украиныг дэмжиж буйгаа илэрхийлсэн жагсаал болж олон мянган хүн оролцжээ. 

Энэ жагсаалд оролцсон хүмүүсийн ихэнх нь Украины төрийн далбааг барин жагсаж, геноцид үйлдэхийг зогсоох, Украины агаарын орон зайг хаах, Оросын хийд хориг тавихыг шаардсан гэнэ. ВВС агентлагийн мэдээлснээр, украинчуудтай эв санаа нэг байгаагаа жагсагчид илэрхийлэн, энгийн иргэдийг хөнөөж байгааг эсэргүүцэн газар хэвтсэн байна. Мөн тэдний ихэнх нь ийнхүү хэвтэж эсэргүүцэл илэрхийлэхдээ гараа хүлсэн байжээ. 

Үүний зэрэгцээ Ганноверт 350 орчим автомашин Оросыг дэмжсэн авто жагсаал зохион байгуулсан байна. Харин Украиныг дэмжсэн жагсаал болсон Майны Франкфурт хот Оросыг дэмжсэн ийм авто цуваа зохион байгуулахыг хоригложээ.Гэхдээ явган жагсаал хийхийг зөвшөөрсөн бөгөөд энэ жагсаалд Оросыг дэмжсэн хэдэн зуун хүн оролцсон байна. .

Беларусь дахь жагсаал ба дарамт шахалт 

Оросын холбоотон улс болох Беларусьт ч дайн эсэргүүцсэн жагсаал хоёр сар орчмын хугацаанд үргэлжилж байна. Гэсэн ч ийм төрлийн жагсаалд оролцсон хүмүүсийг олноор нь саатуулж, торгууль ногдуулж, захиргааны хэрэгт татсаар байгаа талаар newx.zerkalo.io мэдээлжээ. 

Энэ улсад хамгийн эхний жагсаал хоёрдугаар сарын 27-ны өдөр буюу дайн эхэлснээс гурав дахь өдөр эхэлсэн бөгөөд энэ өдөр Беларусийн Новополоцк хотод хүмүүсийг олноор нь баривчилсан байна. Тухайн өдөр орон нутгийн түр саатуулах байранд 80 хүнийг авчиржээ. Хүний эрхийг хамгаалагчдын мэдээлснээр, тухайн үед 20 гаруй хүнд шийтгэл оноосноос нэг хүнийг 12 хоног, өөр нэг иргэнийг 30 хоног баривчлахаар шийтгэсэн бол бусдын нь 15 хоног баривчлан саатуулахаар болсон байна. 

Украинд зэвсэг нийлүүлэхийг эсэргүүцсэн жагсаал  Словакт болов 

Украин руу зэвсэг нийлүүлэхээ зогсоохыг засгийн газраасаа шаардсан, харин Европын холбооны удирдагчдыг энхийг сахиулагчийн үүрэг гүйцэтгэж, АНУ-ын бус харин Европын ашиг сонирхолд нийцсэн бодлого явуулахыг шаардсан жагсаал Словакийн  Братислав хотод дөрөвдүгээр сарын 10-ны ням гарагт болсныг Евроньюс дамжуулжээ. 

“ЕХ-ны гишүүн орнуудын удирдагчид энх тайвнаас илүү дайны талаар ярьж байгаа нь сэтгэл түгшээж байна. Украин руу байнга зэвсэг нийлүүлж байгаа хүмүүс зэвсэгт сөргөлдөөн, хурцадмал байдлыг үргэлжлүүлэх сонирхолтой нь илт. Европын холбоо сульдаж, АНУ-ын гадаад бодлого болон цэргийн ашиг сонирхлыг л дагаж байна” хэмээн жагсагчдын шаардлагад өгүүлжээ. 

Мөн ойрын хугацаанд дайныг зогсоож, сөргөлдөгч талууд хэлцлийн ширээний ард суух нөхцлийг бүрдүүлэхийн тулд Европын холбоо бүхий л боломжоо ашиглан, нөлөөлөх ёстой гэж жагсагчид үзсэн байна.

“Дайныг дэвэргэгчдэд үгүй гэж хэлцгээе” нэртэй энэ жагсаал Словакийг чөлөөлөх үед амь эрсэдсэн Улаан армийн цэргүүдийн хөшөөний дэргэд болжээ. Энэ жагсаалд 3,5 мянган хүн оролцсон байна. 

Энд дуулгахад, Словак өмнө нь Украин руу С-300 зенит пуужингийн комплекс нийлүүлж байлаа. Түүнчлэн сөнөөгч онгоц илгээх асуудлыг хэлэлцэж байгаа юм. 

Монголд Оросыг дэмжсэн жагсаал болов 

Дөрөвдүгээр сарын есний бямба гарагт Оросыг дэмжсэн жагсаал Монголд боллоо. “Шинэ Орос нийгэмлэг-Монгол дахь нөхөд” төрийн бус байгууллагын зохион байгуулж, 300 гаруй хүн оролцсон энэ жагсаал Маршал Г.К.Жуковын талбай дээр болсон юм. 

Энэ үеэр Г.К.Жуковын хөшөөний суурин дээр Донбасст төрсөн, амьдарч байсан хүүхдүүдийн хөрөг зургийг тавьсан байв. 
Жагсаалд оролцогчид “Даян дэлхийд фашизм хэрэггүй”, “НАТО-г өргөжүүлэхийг эсэргүүцэж байна”, “Орос, Монголын эв үүрд мөнх”, “ОХУ-ыг, Путинийг барууны тархи угаалтаар харлуулахаа зогсоо!”, “1945 онд нацизм, фашизмын эсрэг тэмцсэн, 2022 онд нацизм, фашизмыг бүрэн ялахын төлөө!” зэрэг лоозонгууд барин жагссан байлаа.

 
Жагсагчид хэвлэл мэдээллийнхнийг “дан ганц барууны эх сурвалжаас авсан” мэдээлэл дамжуулж байгаад буруутгаж, олон талт мэдээлэл дамжуулахыг шаардаж байв. Түүнчлэн Словакт болсон жагсаалын адилаар зэвсэг нийлүүлэхийг ч эсэргүүцэж байлаа. “АНУ, Их Британи, Европын улсууд Украинд зэвсэг нийлүүлэхээ зогсоо!” гэсэн лоозон барин зогссон оролцогч ч байсан юм. 

Г.Бямбасүрэн