ОХУ-ын Украинд гаргаж буй үйлдэл нь "геноцид" буюу "үй олноор хөнөөх явдал" гэж АНУ-ын Ерөнхийлөгч Жо Байден мэдэгдэж байв. Түүний ийм байр суурийг дэмжиж байгаагаа Канадын Ерөнхий сайд Жастин Трюдо илэрхийлжээ. 

"Хүмүүс Орос, Владимир Путиний хийж байгаа үйлдлийг илэрхийлэхдээ "геноцид" гэдэг үг улам ихээр ашиглах болсон нь туйлын зөв гэж би бодож байна. Энгийн иргэд рүү халдах, бэлгийн хүчирхийллийг дайны зэвсэг болгох хүслийг бид олж харсан. Энэ бол байж болшгүй зүйл" хэмээн Жастин Трюдо мэдэгдсэнийг DW агентлаг дамжуулжээ. 

Түүнчлэн тэрбээр Оросын төрийн тэргүүнийг цэргийн гэмт хэргийнх нь төлөө Олон улсын шүүхээр оруулах санаачилгыг гаргасан анхны улс орнуудын нэг нь Канад байсан гэдгийг Трюдо онцолсон байна. 

Энд дуулгахад, Цагаан ордны тэргүүн Украин дахь үйл явдлыг геноцид хэмээн нэрлэсэн бол Францын Ерөнхийлөгч Эммануэль Макрон ийм нэр томъёо ашиглахаас татгалзаж байгаа юм. Тэрбээр ийм нөхцөл байдалд үг хэлээр сөргөлдөөнийг хурцатгах, дэвэргэх шаардлагагүй хэмээн үзэж байгаагаа илэрхийлж байв. Гэхдээ Оросын цэргүүд Украинд цэргийн гэмт хэрэг үйлдэж байгааг Макрон хүлээн зөвшөөрсөн юм.

Г.Бямбасүрэн