Гадаад харилцааны сайд Б.Батцэцэг Монгол-Хятадын боомтын үйл ажиллагаа сүүлийн сарын хугацаанд сайжирч, ахиц гарч байгааг хэлж байна.

Тэрбээр “Гадаад харилцааны яам БНХАУ-тай хил, боомтын үйл ажиллагааг сэргээж, хэвийн байдалд оруулахын төлөө сүүлийн хоёр жил тасралтгүй, өдөр шөнөгүй ажиллаж байна. Хятадын Гадаад харилцааны яамыг залхтал нь асуудлыг тавьж, дипломат түвшинд хүсэлтүүдээ илэрхийлж, манай нөхцөл байдлыг ойлгохыг хүсэж байна.

Манай хоёр орны улс төрийн харилцаа маш сайн байгаа, ямар ч үл ойлгоцол байхгүй. БНХАУ-ын зүгээс чадлынхаа хэрээр боломжийнхоо түвшинд бүх дэмжлэгийг манайд үзүүлж байгаа. Хятадын  ковидын дэглэм хэвээр үргэлжилж, хариуцлага алдсан албан тушаалтан хатуу арга хэмжээ авах үйл ажиллагаа үргэлжилж байна. Мөн Хятад улс хуурай замын боомтоор 12 улстай хиллэж, автозам 82, төмөр замын 22 боомттой. Үүний тал хүрэхгүй хувь нь өнөөдөр ажиллаж байна. ОХУ-тай хиллэдэг 18 боомтын 5, манайхтай хиллэдэг 13 боомтын 5 нь ажиллаж байна. Ковидын нөхцөл байдал сайжрахаар шат дараатай нээж байна. Монгол Улсад илүү давуу байдал олгож байгаа. Иргэдийн зорчих хөдөлгөөн зогссон ч экспортын гол гарц нээлттэй байгаа.

Би хамгийн сүүлд Ван И сайдтай ярихдаа Гашуунсухайтын боомтоор хоногт 1000 тээврийн хэрэгсэл гаргах саналаа тавьсан. Хятадууд манайд халдвар хамгааллын дэглэмээ сайн баримтлах шаардлага тавьж байгаа.

Нүүрс тээврийн таван боомтод Хятадтай адил лаборатори байгуулахаар болсон. БНХАУ-ын ГХ-ны сайд Ван И-ийн санаачилгаар нийт 20 сая юанийн өртөгтэй лабораториудыг Монгол Улсад хандиваар өгч байгаа. Экспортын гарцад нөлөөлөх лабораторийг удахгүй суурилуулна” гэсэн мэдээллийг өглөө.  

Б.Хэрлэн