Ачаа илгээгч тухайн барааг өмчлөх эрхээ баталгаажуулж чадахгүй бол ачаа бараатай илгээмжийг хүргэхгүй гэж Оросын CDEK хүргэлтийн компани мэдэгджээ. Энэ талаар Оросын "Медуза" хэвлэл мэдээлсэн байна. 

Эх сурвалжийн мэдээлснээр, хүргэлтийн компанийн ажилтнуудыг илгээмж хүлээн авахдаа илгээгч тухайн барааг эзэмших эрхтэйг нотлох баримтыг шалгах үүрэг өгсөн байна. Бараа өмчлөх эрхийг баталгаажуулсан баримт байхгүй бол хүргэлтийн үйлчилгээ үзүүлэхээс татгалзах аж.

Энэ шийдвэр дөрөвдүгээр сарын тавны өдөр хүчин төгөлдөр болсон бөгөөд дэлхийн 27 орны 67 мянган суурин газарт хүргэх үйлчилгээнд энэ шийдвэр хамаарах юм байна. Оросын цэргүүд Украинд дайтах үеэрээ дээрэмдэж, тоносон эд зүйлээ шуудангаар илгээх нь эрс нэмэгдсэн тул ийм шийдвэр гаргахаар болсон гэж эх сурвалж онцолжээ.

Энд дуулгахад, Украинд байлдаж яваа Оросын цэргүүд украинчуудын гэр орноос эд зүйл ихээр тонож байгаа талаарх мэдээлэл Украины хэвлэлүүдээр гарсаар байгаа юм.Түүнчлэн Оросын цэргүүд Украинаас дээрэмдсэн эд хөрөнгөө зардаг зах Беларусийн Наровля хотод бий болсон талаар Украины Батлан хамгаалах яамны Тагнуулын ерөнхий газар дөрөвдүгээр сарын эхээр мэдээлж байв. 

Тагнуулынхны мэдээлснээр, энэ зах дээр Оросын цэргүүд дээрэмдэж авсан угаалгын машин болон аяга таваг угаагч, хөргөгч, үнэт эдлэл, машин, дугуй, мотоцикл, ваар сав, хивс, урлагийн бүтээлүүд, хүүхдийн тоглоом, гоо сайхны бүтээгдэхүүнийг зардаг гэнэ. Түүнчлэн Оросын цэргүүд хулгайлсан доллар, еврогоо солих гэдэг ч дотоодын хязгаарлалтын улмаас беларусууд мөнгө солих дургүй байдаг гэж Радио Свобода мэдээлжээ. 

Г.Бямбасүрэн