Алтанбулаг-Хиагтын шалган нэвтрүүлэх боомтоор нэвтрэхэд "Оросын талд хэт удаан шалгадаг, үүнээс болж их дараалал үүсдэг" гэж Монголын зорчигчид ярьдаг. Олон жил үргэлжилсэн энэ асуудал төдийлөн шийдэгдэхгүй байсан. Харин энэ удаад Буриадын бизнесменүүд Хиагт шалган нэвтрүүлэх боомтын гааль, шалгагчид хэт удаан шалгаж, урт дараалал үүсгэдэг талаар Буриадын тэргүүн Алексей Цыденовт дуулгажээ. Энэ талаар "Номер один" сонин мэдээлсэн байна. 

Эх сурвалжийн мэдээлснээр, Буриадын Засгийн газрын дэргэдэх эдийн засгийн штабын ээлжит хуралдаанд бизнес эрхлэгчид оролцон, хил нэвтрэхэд гардаг хүндрэлийн талаар ярьжээ.  Бичиг баримтыг хэт удаан шалгадаг, гаалийн бүрдүүлэлт хийхэд ихэд уддаг нь логистик бизнесийнхэнд хүндрэл учруулж, ихээхэн цаг хугацаа алддаг гэж бизнес эрхлэгчид өгүүлжээ. Тээвэрлэлтийн компанийн захирлын өгүүлснээр, нэг ачааны машин хилээр нэвтрэх гэж хонон өнжин хүлээх тохиолдол ч гардаг гэнэ. 

"Хоёр долоо хоногийн өмнө Солонгосын компаниас ирсэн ачаа Владивостокт ирсэн. Владивостокийн хилээр нэвтрэхэд ямар ч асуудал гарсангүй. Харин Орос-Монголын хил дээр ачааг гаргаагүй, буруу лацтай гэсэн шалтгаанаар саатуулсан" хэмээн компанийн захирал өгүүлсэн байна. Түүнчлэн Монголын бизнесменүүд ч "танай хилээр ачаа гаргах ямар ч боломжгүй" гэдэг хэмээн тэрбээр өгүүлжээ. 

Зөвхөн ачаа тээврийнхэн төдийгүй хувийн машинаар хил нэвтрэх гэж байгаа энгийн иргэд ч хил нэвтрэхэд хүндрэлтэй байдаг талаар Буриадын тэргүүн Алексей Цыденовт мэдээлсэн хэмээн эдийн засгийн штабын хурал даргалагч мэдээлснийг "Номер один" дамжуулжээ. 

"Нэг жижиг тэргийн бүрдүүлэлтийг хийх гэж нэг цаг болж байна. Хиагт руу өдөрт 40 машин л оруулж байна гэсэн мэдээлэл надад ирсэн" хэмээн эдийн засгийн штабын хурал даргалагч өгүүлжээ. 

Хил дээр үүсдэг энэ асуудал нь Холбооны хууль тогтоомжоор тогтоосон дүрэм журмаас үүдэлтэй гэж Буриадын Гаалийн газрын дарга Игорь Кокорин тайлбарласан байна. 

“Хязгаарлалт тавигдсан бараа бүтээгдэхүүнтэй холбоотой журам үйлчилж байгаа. Аливаа тохиолдол бүрт харилцан адилгүй хугацаа шаардагддаг” хэмээн тэрбээр өгүүлжээ. 

Түүнчлэн хувийн автомашинтай иргэд ч удаан хугацаанд хүлээх шаардлагатай болдогийг Игорь Коркин хүлээн зөвшөөрөөд, гэхдээ энэ нөхцөл байдал түр зуурынх хэмээсэн байна. 

“Тээврийн хэрэгслийг бүртгэх журам үйлчилдэг. Тухайн тээврийн хэрэгсэл анх удаа хилэр нэвтэрч байгаа бол бүртгэл хийлгэхэд хагас цагийн хугацаа шаардагддаг. Тээврийн хэрэгсэл эзэмшигчээс мэдүүлэг авч, хөдөлгүүр, дугаар зэргийг нь тулгаж шалгах шаардлагатай болдог юм.  Харин нэгээс дээш удаа зорчиж байгаа бол 5-10 минут л шаардлагатай. Одоогийн байдлаар дийлэнх машин анх удаа зорчиж байгаа учраас удаж байгаа” хэмээн Игорь Коркин өгүүлжээ. 

Түүний өгүүлснээр, одоо нэг суудлын машиныг бүртгэхэд 21-30 минут зарцуулагдаж байгаа гэнэ. Мөн боомтын ажилтнууд хүрэлцээгүйн улмаас хил дээр урт дараалал үүсдэг гэдгийг тэрбээр онцолсон байна. 

“Бид орчин үеийн шалган нэвтрүүлэх боомт нээсэн, гэтэл манай руу ирж байгаа хүн алга. Анхандаа Монголоос бараг бүгд л нааш ирж байлаа, харин одоо больсон. Учир нь хил дээрх дараалалд найман цаг зогсох нь утгагүй шүү дээ. Энэ нөхцөл байдлыг хэрхэн засах талаар саналаа гарга” хэмээн Буриадын тэргүүн Цыденов мэдэгджээ. 

Г.Бямбасүрэн